Интернэт түшиглэсэн үйлчилгээний цар хүрээ өсч, нууцлал хадгалах түвшин нэмэгдэн, хэрэглэгчдийн тоо, хүртээмж өсөхтэй зэрэгцэн сүүлийн жилүүдэд энэ боломжийг ашигласан элдэв бэлгийн гаж донтон бүлэглэлийн тоо өссөөр. Өчигдөр гэхэд Германы цагдаа нар 22-60 насны 10 эрэгтэй, 57 настай эмэгтэй оролцсон хүүхдийн эсрэг бэлгийн гаж үйлдэл хийдэг бүлэглэлийг илрүүлэн баривчилсан байна. Бүлэглэлийн гишүүд интернэт, гар утас гэх мэт электрон харилцааны хэрэгслээр дамжуулан хоорондоо холбоо барьж, насанд хүрээгүйчүүдийг бэлгийн гаж үйлдэл хийхэд уруу татдаг байж. Бүлэглэлийн доторх нууцлал маш өндөр байсан хэдий ч Германы цагдаа нар чадварлаг ажилласнаар бүлгийн гишүүд нь жилдээ нэг удаа нууц уулзалт хийж хоорондоо мэдээлэл солилцон, гаж үйлдэлд уруу татсан хүүхдүүдийн хаяг, утас зэргийг солилцдог байсныг тогтоожээ. Улмаар нарийн ажиглалт явуулснаар гаж донтнуудыг энэ жилийн нууц уулзалтын үеэр үйлдэл дээр нь илрүүлэн баривчилсан байна. Германы цагдаа нар баривчлагдсан бүлэглэлийн үйл ажиллагаа явуулдаг онцлогийн талаар дэлгэрэнгүй тайлбар өгөөгүй ч гаж үйлдэлдээ хүүхдүүдийнхээ интернэт харилцаа холбоо, танилын хүрээг ашигладаг байсан гэдгийг хэлж.