Монгол түмний баяр үндэсний их баяр наадмаа энэ жил хэрхэн зохион байгуулах талаар  Монгол Улсын Шадар сайд, Үндэсний их баяр наадмыг зохион байгуулах комиссын дарга У.Хүрэлсүх соёл урлагийн төлөөлөлүүдийг хүлээн авч, санал бодлоо солилцсон байна. Баяр наадмын үеэр монгол түмнээ хэрхэн сэтгэл хангалуун баярлуулах, наадмын нээлт болон хаалт, төрийн хүндэтгэлийн концертийг хэрхэн хийх зэрэг наадмыг тойрсон олон асуудлын талаар тус уулзалтын үеэр хэлэлцсэн байна.

Шадар сайд У.Хүрэлсүх уулзалтанд оролцогч соёл урлагийн байгууллагынханд хандан “Үндэсний их баяр наадам бол бидний эв нэгдлийг илэрхийлсэн төрийн ажил учраас соёл урлагийн байгууллагынхан хариуцлагатай хандаж оролцох ёстой. Энд улс төржилт байх ёсгүй. Төрийн наадам бол бүх монгол түмний эв нэгдлийн баяр учраас сахилга, хариуцлагатай байж хүн бүр сэтгэл гаргаж хоорондоо харилцаа хамааралтай, хамтын ажиллагааг эрхэмлэж зохион байгуулах хэрэгтэй. Уран бүтээлчдээ дэмжиж соёл урлагийн байгууллагуудаа түшиж ахмад, дунд, залуу үеийн залгамж халааг хангасан, санал бодлыг нь тусгасан байдлаар хандан өндөр түвшинд зохион байгуулахыг Үндэсний их баяр наадмын соёл, урлагийн салбар хорооны дарга, БСШУ-ны дэд сайд Д.Төмөрбаатар болон бусад соёл урлагийн байгууллагын удирдлагуудад  үүрэг болголоо.