Нийслэлийн тээврийн газраас бага оврын автобусыг нийтийн тээврийн үйлчилгээнээс халах зорилгоор зарим шугам чиглэлийг хаажээ. Үүнийг эсэргүүцэн хувиараа нийтийн тээврийн үйлчилгээ эрхлэгчдийн Үйлдвэрчний эвлэлийн хорооноос мэдэгдэл гаргажээ.

Нийслэлийн Сонгинохайрхан дүүргийн 23 дугаар хорооноос Баянзүрх дүүргийн 21 дүгээр хороо хүртэлх маршрутыг хааснаас болж бага оврын автобусны үйлчилгээ эрхлэгч жолооч, иргэдийн ажлын байр хөндөгдсөн байна. Тиймээс дээрх үйлдвэрчний холбооноос 400 хүний гарын үсэгтэй уг шийдвэрийг эргэн харж шийдвэрлэхийг хүссэн бичгийг Нйислэлийн тээврийн газар болон Нийслэлийн Засаг дарга Э.Бат-Үүлд өнгөрсөн лхагва гарагт хүргүүлжээ. Энэ талаар ямар нэгэн хариу ирүүлэхгүй байгаагаас маргааш буюу мягмар гарагт Чингисийн талбайд 100 микробус бүхий жагсаал зохион байгуулна гэдгээ бага оврын автобус эрхлэгч жолооч, кондукторууд мэдэгдлээ.