Аугаа их эх орны дайны ялалтын 70 жилийн ойг ОХУ-д тавдугаар сарын 9-нд тэмдэглэнэ. Энэ дайнд оролцож байсан ахмад дайчдад зориулсан хүндэтгэл үзүүлэх ажиллагааг манай улс энэ сарын 8-ны өдөр ёслон тэмдэглэх гэж байна.

Уг ажиллагааг нийслэл хот Улаанбаатарт тэмдэглэх бөгөөд Нийслэлийн цэргийн штабаас зохион байгуулна. Ёслол, хүндэтгэлийн ажиллагааны тухай Нийслэлийн цэргийн штабын дарга, хурандаа Ж.Болдбаатар өнөөдөр Хангарьд ордны хурлын танхимд мэдээлэл хийлээ. Тавдугаар сарын 8-ны өдрийн 11 цагаас СТӨ-нд Эх орны дайны ялалтын баярт зориулсан баярын хурал, хүндэтгэлийн концерт тоглох юм. Энэ ажиллагаанд нийслэлийн иргэдийг өргөнөөр оролцохыг Нийслэлийн цэргийн штабын дарга хэллээ. Мөн өдрөөр нийслэлийн бүх дүүргийн Засаг даргын тамгын газар, цэргийн штаб хамтран дайнд оролцсон ахмад дайчдын гэрээр очиж хүндэтгэл үзүүлнэ.  Дүүрэг, дүүрэг дээрээ ч хүлээн авч, хүндэтгэл үзүүлэх юм гэдгийг бас энэ үеэр мэдээллээ. Эх орны дайнд биеэр оролцсон 200 гаруй ахмад дайчин байдгийн 195 нь нийслэлд амьдардаг байна.