Энэ оны гуравдугаар сараас эхлэн дэгдсэн  улаанбурхан өвчний тохиолдол өдөр ирэх тусам нэмэгдэж байгаа аж. Улсын хэмжээнд нийтдээ 3790 сэжигтэй тохилдол бүртгэгдээд цаашид ч нэмэгдсээр байгаа учир  өвчний тархалтыг бууруулах, хязгаарлах хариу арга хэмжээний хүрээнд дархлаажуулах ажил зохион байгуулж энэ сарын 15-25-нд улсын хэмжээнд зургаан сартайгаас таван насны бүх хүүхдэд Улаанбурхны эсрэг вакцин тарихаар шийдвэрлэсэн. Урьдчилсан мэдээгээр энэ насны 370.000 хүүхэд бий гэсэн тооцоо гарсан тул шаардагдах вакциныг захиалан, НҮБ-ын Хүүхдийн сан, ДЭМБ-ын тусламжтайгаар авчирсан талаар холбогдох байгууллагын мэргэжилтнүүд мэдээллжээ. Гэтэл  энэ өвчнөөр зөвхөн хүүхдүүд биш том хүмүүс хүртэл өвчилж байгаа талаар ШУТИС-ийн төв байранд гарч  өвчний дэгдэлт хяналтаас гарах шахаж буй талаар хүмүүс фэйсбүүк хуудсаар дамжуулан мэдээлэх болсон. Тиймээс Монголын оюутны холбоо Эрүүл мэндийн яамтай хамтарч өчигдрөөс нийслэл дэх  бүх дотуур байранд амьдардаг оюутнуудыг улаанбурхны эсрэг вакцинд хамруулж эхэлжээ.
Энэ талаар МОХ-ны мэргэжилтнээс тодруулахад “улаанбурхан өвчний дэгдэлт намдтал томоохон сургуулиудад хөл хорио тогтоогоосой гэж хүсч байна. Их хурдтай нэмэгдэж байна. Сургуулиудын эмнэлгүүд бас их хариуцлагагүй ажиллаж байгаа нь анзаарагдсан. 35 мянган оюутантай ШУТИС гэхэд гурван эмчтэй юм билээ. Тус сургуулийн нэг ангиас дунджаар гурваас дөрвөн оюутан улаанбурхан туссан  гэсэн мэдээлэл бий. Энэ гуравхан эмч хэдэн мянган оюутанд яаж эмнэлгийн үйлчилгээ үзүүлэх вэ дээ. Тэгэхээр бусад сургуулийн удирдлагууд ч гэсэн энэ асуудлыг бодолцож үзээд эмч нарынхаа тоог нэмэх хэрэгтэй юм болов уу” гэлээ.