"Оюутолгой" болон "Рио Тинто" компанийн төлөөлөл өнөөдөр "Оюутолгойн гүний уурхайн төсөл"-ийн санхүүжилтийн гэрээнд гарын үсэг зурна.

Гарын үсэг зурах ёслолын ажиллагаа "Шангрила" зочид буудлын хурлын танхимд 12:00 цагт болох юм. Уг арга хэмжээнд Ерөнхий сайд Ч.Сайханбилэг оролцоно. Ерөнхий сайд өнгөрсөн сарын 11-нд МҮОНТ-ээр мэдээлэл хийх үеэрээ Шийдлийн Засгийн газрын нэг жилийн хугацааны ажлыг нэгтгэн дүгнэж, үг хэлсэн. Тэрбээр, "Оюутолгойн гүний уурхайн бүтээн байгуулалт гацаанаас гарч, бодит ажил хэрэг боллоо. Та бүхэнд шинэ сэргэг, эерэг сайн мэдээ дуулгая. Олон улсын банкууд 4,2 тэрбум ам.долларын төслийн санхүүжилт олгохоор энэ 7 хоногт эцэслэн шийдвэрлэсэн байна. Ирэх 12 сарын 16-нд Улаанбаатар хотод албан ёсоор баталгаажуулж, олон улсад зарлахаар товлолоо. Нэг том төслийн эргэн сэргэлт бусад том төслүүдийг хөдөлгөөнд оруулж байна. Их ажилтай байна, энд тэндгүй их бүтээн байгуулалт дахин эхэлнэ гэдэг нь эдийн засгийн сэргэлтэд хөтөлнө. Эдийн засаг сэргэнэ гэдэг нь эцсийн дүндээ монгол хүн ажилтай, авах цалинтай, монгол компаниуд олох ашигтай, Монгол Улс авах татвартай байхын эх үүсвэр, үндэс суурь билээ" хэмээн мэдэгдсэн. Уг мэдэгдэл өнөөдөр ийнхүү бодит ажил болж байна.