“Их майдар” сангийн гүйцэтгэх захирал Б.Цогтбаярыг өнөөдөр /мягмар гараг/ цагдаагийнхан бас баривчилжээ. Ийнхүү УИХ-ын гишүүн Х.Баттулгын эргэн тойрны, түүний бизнесийн гол гол хүмүүсийг баривчлах явдал монголын аялал жуулчлалын цоо шинэ, томоохон бүтээгдхүүн Их Майдар хөшөө, цогцолбор бүтээж  байгаа газрын захирлаар үргэлжиллээ.

Хууль сахиулагчид ямар шалтгаанаар барьснаа задлахгүй байгаа ч УИХ-ын эрхэм гишүүн Х.Баттулгыг төмөр замын санхүүжилтийн асуудлаар шалгаж байгаатай холбон барьсан нь ойлгомжтой байна.
Магадгүй Б.Цогтбаяр захирал нэгэнтээ хэвлэлд өгсөн ярилцлагадаа олон түмний хандив, Х.Баттулга гишүүний өөрийн нь хөрөнгөөр босгож байгаа гээд хэлчихсэн нь шалтаг болсон ч байж болох.

Манай АТГ,  хүчний байгууллагууд ингэж нэр нөлөө бүхий хүмүүсийг шалгахдаа эргэн тойрны нь хүмүүсийг дайчлан баривчилдаг туршлагатай.
Монгол Улсын ерөнхийлөгч асан Н.Энхбаярыг 2012 оны дөрөвдүгээр сард оймсыг нь гозолзуулан барихын өмнө мөн л түүний ойрынхныг баривчилж байсан.
Ерөнхий сайд асан, УИХ-ын гишүүн Н.Алтанхуягийг бас л шалгаж мөрдөж, туслах, хүргэн гээд хүмүүсийг барьж хорьсон.

Нийгмийн даатгалын хөрөнгөний асуудлаар УИХ-ын гишүүн С.Эрдэнийг шалгаж байна, буруутай буруугүй гэх үеэр бас л и йм дайчилгаа болж байсныг уншигчид мартаагүй.

Чухамдаа Н.Алтанхуяг УИХ-ын гишүүн хэвээрээ, халдашгүй бүрэн эрх нь хэрэгжиж байсан тулдаа баривчилгаанаас үлдсэн байхыг үгүйсгэхгүй.

Б.Цогтбаярыг баривчлахын өмнөх өдөр  лхагва гарагт Баянгол зочид буудал дахь Х.Баттулгын албан өрөөнд нэгжлэг хийж компьютер бичиг баримт хурааж авсан. Ажиллагаанд цагдаагийн тусгай хүчний 500 гаруй хүн оролцсон гэдэг ч цагдаагийнхан үүнийгээ “Нэгжлэг хийж байгаа ажилтнуудынхаа ажиллах нөхцөлийг хангах гэсэн юм. Түүнээс биш ямар нэг баривчилгаа хийх, хэн нэгнийг барих гэсэн хэрэг биш” гэж мэдэгдээд өнгөрсөн.

Харин энэ үйл явдлыг дургүйцэн хүлээж авсан иргэд энэ бол ердөө л Х.Баттулгыг энэ хавар болох УИХ-ын сонгуульд нэр дэвшүүлэхгүйн төлөө хийж байгаа кампанит ажил гэж хүлээн авч байна.

Юутай ч УИХ-ын гишүүн Х.Баттулгатай ямар нэгэн шижмээр холбоотой, түүний бизнесийн салбаруудын гол гол хүнийг “шалгана” гэдэг нэрийдлээр дайчлан баривчлах ажил үргэлжилсээр байна.
Х.Баттулгатай л холбоотой, түүний харьяа хамааралд байдаг л бол хөхүүл хүүхэдтэй, эрэгтэй эмэгтэй хамаагүй АТГ, цагдаагийнхны хараанд өртөөд байна.

Хүчнийхний гаргаад байгаа нэрсийн жагсаалт хэн хэнээр үргэлжилж, хэдий болтол ийм явдал давтагдах юм бол. УИХ-ын сонгууль хүртэл үү.......

Хүмүүс яг л 1937 он шиг өглөө босоод “өнгөрсөн шөнө хэнийг барьсан бол” гэж нэгнээсээ асуухад хүрээд байгаа юм биш үү.