МАН-ынхан Засгийн эрхэнд гарсаар төрийн албанд халаа сэлгээ хийж, хамгийн сүүлийн мэдээллээр 30 орчим мянган төрийн албан хаагч ямар нэгэн байдлаар ажлаасаа халагдсан гэх мэдээллийг сөрөг хүчний бүлэг мэдээлж байна.
Харамсалтай нь, төрийн эрх солигдоод хагас жилийн хугацаа өнгөрч байгаа ч өнөө хэр “хоморголон” ажлаас халах байдалд өөрчлөлт ороогүй байна. Жишээ нь, “Хан-Уул дүүргийн ИТХ-ын 22, Засаг даргын Тамгын газрын 33 төрийн албан хаагчийг үүрэгт ажлаас нь үндэслэлгүй халах, зохион байгуулалттай үйл ажиллагаа явагдлаа” гэж Хан-Уул дүүргийн АН-аас мэдээллээ.Үүнтэй холбогдуулан Хан-Уул дүүргийн АН-ын бүлгээс ИТХ-ын дарга, Засаг дарга болон Засаг даргын тамгын газрын даргын үүрэг гүйцэтгэгч нарт Төрийн албан хаагчдыг хууль бус, үндэслэлгүйгээр ажлаас халахаар шийдвэрлэн, мэдэгдэл өгсөнд эсэргүүцлээ илэрхийлэн хугацаатай шаардлага хүргүүлжээ. Шаардлагын хариуг албан бичгээр ажлын гурван өдөрт багтаан өгөхийг шаардаж байгаа бөгөөд Төрийн албаны тухай хууль, Хөдөлмөрийн тухай хууль, Захиргааны ерөнхий хуулийн холбогдох заалтуудыг зөрчсөн үйл ажиллагаагааг нэн даруй зогсоож заасан хугацаанд хариу ирүүлээгүй тохиолдолд улс төрийн шат дараалсан арга хэмжээ авахыг мэдэгджээ. Мөн Төрийн албан хаагчдыг үндэслэлгүйгээр хомроголон халж байгааг эсэргүүцсэн Хан-Уул дүүргийн 55 албан хаагч түр хороо байгуулж, шаардлагын хариуг хүлээж байгаа юм байна.