Монгол Улсын Ерөнхийлөгчийн сонгууль ирэх зургадугаар сарын 26-нд болно. Намууд сонгуульд нэр дэвших эрхмээ ирэх тавдугаар сард тодруулах юм. МАН, МАХН-ынхан одоогоор хэнийг нэр дэвшүүлэх нь тодорхойгүй байгаа.

Харин АН-ынхан нэр дэвшигчээ бүх гишүүдийнхээ санал хураалтаар тодруулна гэж намын дарга С.Эрдэнэ мэдэгдсэн. Одоогоор тус намаас хэд хэдэн эрхэм Ерөнхийлөгчийн сонгуульд нэр дэвшихээр нэр нь дуулдаж буй. Гэхдээ албан ёсоор Ерөнхий сайд асан Н.Алтанхуяг Ерөнхийлөгчийн сонгуульд нэрээ дэвшүүлэхээ мэдэгдсэн билээ. Мөн Хотын дарга асан Э.Бат-Үүл ч нэр дэвшинэ гэсэн юм.

Тэгвэл өнөөдөр Хууль зүйн сайд асан Д.Дорлигжав АН-аас Ерөнхийлөгчийн сонгуульд нэрээ дэвшүүлэх болсоноо албан ёсоор зарлалаа.

Ингэснээр тэрбээр АН-ын Ерөнхийлөгчийн сонгуульд өрсөлдөх сунгаанд оролцохоор болж байгаа юм. Тэрбээр "Намынхаа дотоод сонгуульд өрсөлдөнө. Шийдвэр гаргахад хэд хэдэн хүчин зүйлс нөлөөлсөн" гэсэн юм.

Юутай ч АН-аас Ерөнхийлөгчийн сонгуульд нэр дэвших эрхмүүд эхнээсээ тодорч байна. Гэхдээ намын дотоод сонгуульд ялсан тохиолдолд Ерөнхийлөгчийн сонгуульд өрсөлдөх юм.



-МХЗЭ-ийн төв хороонд эрдэм шижилгээний ажилтнаар ажиллаж байсан Д.Дорлигжав 1989 оноос Монгол оронд өрнөсөн Ардчилсан хувьсгалын манлайлж эхэлсэн МоАХолбоог үүсгэн байгуулалцсанаар улс төрийн амьдралын гараагаа эхэлжээ.

-1989 оны арванхоёрдугаар сарын 10-нд Монголын Ардчилсан Холбоо байгуулагдаж, ерөнхий зохицуулагчаараа Санжаасүрэнгийн Зоригийг сонгожээ. Тэрээр МоАХ-ны ерөнхий зохицуулах зөвлөлийн гишүүнээр ажиллаж эхэллээ.

-1990 оны гуравдугаар сарын 4-нд олон арван мянган хүн оролцсон цуглаан зохион байгуулж, 1990 гуравдугаар сарын 7-ноос Монголын түүхэнд анх удаа улс төрийн өлсгөлөн зарласан бөгөөд 1990 оны гуравдугаар сарын 9-нд МАХН-ын Төв хорооны Улс төрийн товчоо бүрэн бүрэлдхүүнээрээ огцорсноор өлсгөлөн зогссон. Энэ өлсгөлөнд Дорлигжав МоАХ-ны нөхдийн хамт сууж байлаа.

-Төд удалгүй 1990 оны дөрөвдүгээр сарын 8-нд Монголын ардчилсан намыг зохион байгуулах Анхдугаар их хурал болж намын дэд даргаар сонгогджээ. -Мөн 1990 онд болсон анх удаагийн олон намын тогтолцоо бүхий АИХ буюу (тэр үеийн парламентад ) 41-р тойрог буюу 10 дугаар хорооллоос сонгогдож, мөн АИХ хурлаас байгуулагдсан Монголын анхны байнгын ажиллагаатай хууль тогтоох Улсын Бага хуралын гишүүн болжээ. Мөн оны намар Д.Бямбасүрэн Ерөнхий сайдаар ахлуулсан хамтарсан Засгийн газарт 31 настайдаа Шадар сайд болжээ.

-1996 онд Ардчилсан холбоо эвслийн Засгийн газар байгуулагдахад уг Засгийн газрын анхны (цэргийн бус энгийн) сайдаар томилогдон ажиллав.

-1998 оны намар М.Энхсайхны удирдсан Засгийн газар огцорсны дараа Монгол Оросын хамтарсан уулын баяжуулах “Эрдэнэт” үйлдвэрийн ерөнхий захирлаар томилогдож ажиллаж байх хугацаандаа Оросын талтай тохиролцож, Эрдэнэт хотын байрыг хувьчлалж өгсөн бөгөөд мөн шөнийн ээлжнийхнийг хоолтой болгох, дөчин хувьтангууд хэмээх ажлын байдлаас болж, эрүүл мэндээр тэнцэхгүй халагдсан ажилчиддаа гурван сая төгрөг хүртлэх нөхөн олговор тэтгэмж олгох, үйлдвэрийн өргөтгөлийг ашиглалтанд оруулах, шинэ технологи нэвтрүүлэх зэрэг ажлыг хийж байжээ. Сонирхолтой нь, түүний эхлүүлсэн ажлыг дараагийн гурав дахь даргын үед тэр технологийн шинэчлэлд төрийн шагнал хүрсэн байдаг. Шо-гийн үед шовойж явлаа, Дорлигийн үед доргиж явлаа… гэсэн яриа гарч байсныг харахад тэрээр олон сайхан ажил хийсэн нь одоо ч яригдсаар байдаг байна.

-Дараа нь 2000 оны УИХ-ын сонгуульд Н.Энхбаяр даргатай МАХН ялалт байгуулж , Ардчилсан намыг УИХ-д ганцхан Наранцацралт гэх гишүүнтэй болсон үед буюу 2000 оны арваннэгдүгээр сард Ардчилсан намын даргын албыг авч салангид байсан таван намыг нэг нам болгон зохион байгуулж, одоогийн Ардчилсан нам байгуулагдаж түүнийг анхны даргаар сонгов.

-2004 онд байгуулагдсан Ц.Элбэгдоржийн Засгийн газарт Ерөнхий сайдын зөвлөхөөр ажиллаж байгаад мэргэжлийн хяналтын асуудал эрхэлсэн сайдаар томилогдов.

 -2007 онд Ардчилсан намын ерөнхий нарийн бичгийн даргаар томилогдсон бөгөөд 2008 оны сонгууль (долоон сарын 1-ний будлиан болж ) Ардчилсан нам ялагдсанаар ерөнхий нарийн бичгийн даргаа хүлээлгэн өгч улмаар 2009 онд болсон Ерөнхийлөгчийн сонгуульд АН-аас нэр дэвшсэн Ц.Элбэгдоржийн сонгуулийн штабыг удирдаж, ялалт байгуулснаар Ерөнхийлөгчийн Тамгын газрын даргаар томилогджээ.

-2010 онд Монгол Улсын ерөнхий прокурор, төрийн хууль цаазны тэргүүн зөвлөх хэмээх албанд буюу анх хуульчийн мэргэжлээрээ ажлынхаа гарааг эхэлсэн Дорлигжав буцаж мэргэжлийн ажилдаа ирж, прокурорыг удирдах болов.

-Таван жилийн дараа буюу 2014 оны арванхоёрдугаар сард Засгийн газрын гишүүн, Хууль зүйн сайдаар томилогдон одоо ажиллаж байгаа бөгөөд 2007 оноос анх эхлүүлсэн Эрүүгийн хуулийн шинэчлэлтийн ажлыг амжилттай дуусган Эрүүгийн хууль, процессын хуулийг УИХ-аар батлуулсан.