Монгол Улсын Ерөнхий сайд Ж.Эрдэнэбат өчигдөр Монгол Улсын Засгийн газрын гишүүн, Боловсрол, соёл, шинжлэх ухаан, спортын сайдаар академич Г.Чулуунбаатарыг томилуулах саналаа УИХ-ын дарга М.Энхболдод өргөн барьсан. Энэ дагуу өнөөдөр УИХ-ын чуулганы нэгдсэн хуралдаанаар оруулж хэлэлцээд хуралдаанд 49 гишүүний  94 хувийн саналаар Г.Чулуунбаатарыг БСШУС-ын сайдаар томиллоо.  Гишүүд түүнд сурах бичгийн алдааг засах, тусгай сургуулиудын асуудлыг цэгцлэх, их, дээд сургуулиудын сургалтын чанарыг сайжруулах, багш нарийн цалин хангамжид анхаарлаа хандуулахыг даалгав.

Г.Чулуунбаатар нь:

-1975-1981 онд МУИС-ийн Философийн салбарыг философич, нийгмийн ухаан багш, судлаач мэргэжлээр бакалавр, магистрын зэрэгтэй төгссөн
-  2013 оноос одоог хүртэл Монгол Улсын ШУА-ийн Философийн хүрээлэнгийн захирал
-  2008-2013 онд Монгол Улсын Засгийн газрын хэрэгжүүлэгч агентлаг Удирдлагын академийн захирал
-  2007-2011 онд НҮБХХ-ийн Хүний эрхийг баталгаажуулах, ардчилсан засаглалыг хөгжүүлэх Мянганы хөгжлийн есдөх зорилгыг хэрэгжүүлэхэд дэмжлэг үзүүлэх төслийн Үндэсний захирал
-  2000-2008 онд УИХ-ын даргын ахлах зөвлөх
-  1997-2009 онд Монгол Улсын ШУА-ийн Философи, социологи, эрх зүйн хүрээлэнгийн захирал
-  2004-2008 онд МАХН-ын Удирдах зөвлөлийн гишүүн
-  ШУА-ийн Тэргүүлэгч гишүүн (одоог хүртэл)
-  Нүүдлийн соёл иргэншлийг судлах олон улсын хүрээлэнгийн Удирдах зөвлөлийн гишүүн
-  2004-2008 онд УИХ-ын дэргэдэх Судалгааны төвийн захирлаар ажиллаж байсан туршлагатай юм байна.