Монгол Улсад болсон Ерөнхийлөгчийн сонгуулийн хоёр дахь шатны санал хураалтад сөрөг хүчин Ардчилсан намаас нэр дэвшигч Халтмаагийн Баттулга өөрийн өрсөлдөгч Ардын намын нэр дэвшигчээс бараг 10 хувийн саналаар тэргүүллээ гэж ВВС агентлаг мэдээлжээ.
Сонгуулийн ерөнхий хорооноос бямба гарагт нийт саналын 99 хувийг тоолоод нийтэлсэн дүнгээр АН-ын нэр дэвшигч Халтмаагийн Баттулга 50,6 хувийн санал буюу 610 мянган сонгогчийн дэмжлэг хүлээсэн бол түүний өрсөлдөгч МАН-ын нэр дэвшигч, Парламентын тэргүүн Миеэгомбын Энхболд 41,2 хувийн санал авчээ.
Шинэ ерөнхийлөгч “Монгол яллаа. Би одоо эдийн засгийн хүндрэлийг даван туулах, өмнө амласнаараа монголчуудын өрийг чөлөөлөхөөс ажлаа эхэлнэ” гэж хэлж байна.
АН-аас нэр дэвшигч  сонгуулийн кампанит ажлынхаа явцад Монгол Улсын өрийг, ялангуяа ард иргэдийн өрийг чөлөөлөх тухай амлаж байсан юм.
Монгол Улсын түүхэнд ерөнхийлөгчийн сонгууль анх удаагаа хоёр шаттай болж байгаа нь энэ.
Халтмаагийн Баттулга залуудаа жү-до, самбо бөхөөр хичээллэж монголын шигшээ багийн тамирчин  байсан юм. Олон жилийн өмнөөс улстөрд орж УИХ-ын гишүүн, Зам тээврийн болон үйлдвэр ХАА-н сайд байсан юм.
Шинээр сонгогдож байгаа ерөнхийлөгч бизнес эрхэлж зочид буудал,Чингис хаанд зориулсан цэцэрлэгт хүрээлэн эзэмшдэг юм хэмээн ВВС агентлагийн мэдээнд дурджээ.