Орос монголын цэргийн хамтарсан “Сэлэнгэ-2017” хээрийн сургууль монголын өмнө говийн Зүүнбаянд эхэллээ гэж оросын цэргийн дорнод тойргийн хэвлэлийн алба мэдээллээ.
“Оросын цэргийн төлөөлөгчдийг монголчууд уламжлал ёсоороо хадаг, сүүтэй угтаж авсан” гэж мэдээлэлд дурджээ.

Угтах ажлын дараа Оросын дайчид байлдааны зэвсэг техникээ буулган монголчуудын бэлтгэсэн хээрийн лагерь луу маршаар хөдөлсөн байна.

Хээрийн сургуулийн үеэр орос монголын дайчдын мото буудлагын болон танкийн салаа, минометын батарей, тийрэлтэт сум бүхий галын хэсэг, иргэний хамгаалалтын салаа, тагнуулын салаад сургуулилт хийж хамтран ажиллах юм. Жил бүр болдог Сэлэнгэ хамтарсан хээрийн сургууль ийн анх удаагаа байгаль цаг уурын хүнд нөхцөлтэй говьд болж байгаа юм.  Хоёр орны цэрэг дайчид хээрийн сургуулиар зэвсэглэсэн хууль бус бүлэглэлийг илрүүлэн устгах ажиллагааг сургуулилна.