Улаанбаатар хотын Захирагчийн ажлын албанаас Хаврын шар усны үерээс урьдчилан сэргийлэх ажлыг зохион байгуулж эхлээд байна. Улаанбаатар хотын Ерөнхий менежерийн 2019 оны А/37 дугаар тушаалаар ажлын хэсэг байгуулж Улаанбаатар хотын үер, усны аюулаас урьдчилан сэргийлэх, ус зайлуулах барилга байгууламжийн хэвийн найдвартай үйл ажиллагааг хангах, аюулгүй ажиллагааг алдагдуулсан аж ахуйн нэгж, албан байгууллагын газар чөлөөлөлтийг хийх, зөрчлийг арилгуулах ажлыг зохион байгуулах, цаашид авч хэрэгжүүлэх арга хэмжээний санал боловсруулах үүрэг даалгаврыг өглөө.
Ажлын хэсгийн ахлагчаар Улаанбаатар хотын Захирагчийн ажлын албаны Инженерийн байгууламжийн хэлтсийн дарга Т.Хэрлэнгээр ахлуулж бүрэлдэхүүнд Нийслэлийн мэргэжлийн хяналтын газар, Нийслэлийн дүүргүүдийн Онцгой байдлын газар, Нийслэлийн хот төлөвлөлт, Ерөнхий төлөвлөгөөний газар, Автозамын хөгжлийн газар, Геодези, Усны барилга байгууламжийн газар зэрэг нийслэлийн холбогдох мэргэжлийн байгууллагууд хамрагдаж байна.
