Дорноговийн Алтанширээ суманд баригдаж байгаа нефть боловсруулах үйлдвэрийн 27 км замыг барих ерөнхий гүйцэтгэгчээр сонгогдсон УБТЗ тус замыг хугацаанаас нь өмнө ашиглалтад оруулахад бэлэн болсноо Монгол Улсын сайд, ЗГХЭГ-ын дарга Л.Оюун-Эрдэнэ, Монгол Улсын Засгийн газрын гишүүн, ЗТХ-ийн сайд Б.Энх-Амгалан нарт танилцуулж, анхны зорчигчдоо тээвэрлэлээ.

Жилийн өмнө эзгүй талд шан татаж байсан бол наймхан сарын дотор олон улсын жишиг стандартад нийцсэн төмөр замыг хямд өртгөөр Монголчууд өөрсдөө барьж чадахыг батлан харуулж чадлаа. Энэхүү бүтээн байгуулалтыг "Шинэ үеийн Монголын сэргэн мандлын эхлэл, өнөөдөр бол түүхэн өдөр" гэж тус замын анхны зорчигч Монгол Улсын сайд, ЗГХЭГ-ын дарга Л.Оюун-Эрдэнэ хэллээ.