Нийслэлийн удирдах ажилтнуудын шуурхай зөвлөгөөний үеэр Нийслэлийн Засаг дарга бөгөөд Улаанбаатар хотын захирагч С.Амарсайхан “Үүссэн нөхцөл байдалд бодилт дүгнэлт хийж, иргэд дахин энэ төрлийн осолд өртөхгүй байх талаар урьдчилан сэргийлэхэд дүүргүүдийн засаг дарга нар болон хэсгийн ахлагч нар анхаарч ажилла. Сайжруулсан түлшний хэрэглээний талаарх мэдээллийг иргэдэд хүргэхэд онцгойлон анхаар” гэдэг үүргийг өгсөн. Тэгвэл үүсээд байгаа нөхцөл байдалтай холбогдуулж хотын дарга сэтгүүлчдэд мэдээлэл өгөв.

Тэрбээр “Урьдчилсан байдлаар түлшний найрлага хэвийн байна гэж гарсан. Гэхдээ бид зөвшилцөөд дээжээ гадаадын лабораторт шинжлүүлэхээр явуулж байгаа. Мөн үйлдвэр дээр хатуу хяналт тавьж ажиллаж байгаа. Утаа, агаарын бохирдлын асуудал олон жил яригдаж ирсэн. Засгийн газраас анх удаа дорвитой арга хэмжээ авсан нь энэ. Энэ асуудал дээр хэн нэгнийг бууртгахаас илүүтэй бодитой мэдээллийг иргэддээ хүргэх хэрэгтэй байна. Буруутай нь тогтоогдвол хариуцлагын асуудал яригдаж л таарна. ” гэлээ.