ЮНЕСКО-ийн Монголын үндэсний комисс нь ЮНЕСКО-ийн Бээжин дэх төлөөлөгчийн газартай хамтран “Хөгжлийн бэрхшээлийн тэгш байдлыг хангах сургалт”-ыг 2019 оны 10 дугаар сарын 14-15-ны өдрүүдэд Улаанбаатар хотноо зохион байгуулж байна.

Статистикийн мэдээллээр 2017 оны байдлаар Монгол улсад хөгжлийн бэрхшээлтэй 103,6 мянган иргэн байдаг ба энэ нь нийт хүн амын 3,3 хувийг эзэлж байна. Хөгжлийн бэрхшээлтэй хүмүүсийн талаарх нийгмийн буруу ойлголт олны дунд зонхилдог бөгөөд энэ нь хөгжлийн бэрхшээлтэй хүмүүсийн нийгмийн оролцооны дутмаг байдлыг үүсгэж байна.

Олон улсын хөдөлмөрийн байгууллагаас санаачлагдсан Хөгжлийн бэрхшээлийн тэгш байдлыг хангах сургалт (Disability Equality Training) нь хөгжлийн бэрхшээлтэй хүмүүсийн хөдөлмөр эрхлэлт, боловсрол, нийгмийн үйл ажиллагаанд тэгш хамруулах тухай олон нийтийн хандлагыг өөрчлөхөд чиглэсэн, динамик, өндөр оролцоотой, интерактив арга барил юм.
Хөгжлийн бэрхшээлийн тэгш байдлыг хангах сургалт нь хөгжлийн бэрхшээл, түүний талаарх гүн гүнзгий ойлголтыг бий болгох, хөгжлийн бэрхшээлтэй хүмүүсийн нийгмийн тэгш оролцоог хангахад шаардлагатай өөрчлөлтийн үндсэн арга хэрэгслийг танилцуулах зорилготой.

Сургалтыг нээж ЮНЕСКО-ийн Монголын үндэсний комиссын Ерөнхий нарийн бичгийн дарга С.Уянга, ЮНЕСКО-ийн Бээжин дэх төлөөлөгчийн газрын Мэдээлэл, харилцаа холбооны асуудал хариуцсан мэргэжилтэн Чинги Зэн нар үг хэлэв.

Сургалтын сургагч багшаар Ирланд улсаас хөгжлийн бэрхшээл, тэгш байдлын олон улсын зөвлөх Маурин Гилберт хүрэлцэн ирсэн бөгөөд сургалтад НҮБ-ын ажилтнууд, олон улсын байгууллага, боловсролын салбарын 20 гаруй төлөөлөл оролцож байна.