Улсын цирк худалдааны байгууллага болоод олон жилийг үдэж байгааг дарга нар саяхан л анзаарсан бололтой. Өнөөх амьтад нь алга, уран бүтээлчид нь цөөрч, улсынх байсан бол арай ч ийм дээрээ тулахгүй байсан гээд уулга алдаж байна. Менежментийн хувьчлал хийж, Д.Дагвадорж аваргад улсын цирк гэхээс илүүтэй, 70 гаруй жилийн хөгжлийг нь хувьчилж өгөх үеэс эхлээд хэл ам, таталж байсан асуудлыг долоон жилийн дараа ойлгож байгааг юу гэж тайлбарлахаа мэдэхгүй юм. Юутай ч, улсын циркийг хувьчилсан нь буруу байсан гэдгийг О.Магнай тэргүүлэгчтэй ШӨХТГ өчигдөр мэдэгдлээ. Ингэхдээ, улсын циркийг худалдааны төв болсон байна хэмээн ихэд онцлов. Цагаан сар, хичээлийн шинэ жилийн бэлтгэлээ циркээр ороод базаачихдаг энгийн иргэдэд дэндүү хуучин энэ асуудал дарга нарын хувьд гэнэтийн зүйл байсан бололтой. Тэгээд л цочирдож гайхсандаа, Д.Дагвадоржийн эсрэг дайн зарлаж, шаардах бичиг хүртэл хүргүүлсэн байна. Угтаа, Төрийн өмчийн хороо Улсын циркийг менеж­ментийн хувьчлалд оруулах нээлттэй тендер зарлахдаа улсдаа ганцхан байгууллагыг хувь­чилж байгаагаа бодол­цон тусгай журам баталсан байдаг.

Өөрөөр хэлбэл, бусад аж ахуй нэгжийн босго оноог 70-аар тогтоож байсан бол циркийг хувьчлах тен­дерийн саналын босгыг 80 бол­гон өсгөсөн юм. Энэ нь, циркийн үйл ажиллагааг цаа­шид хэвийн хэмжээнд авч үлдэх, улам бүр өргө­жүү­лэх давхар санааг илт­гэж байсан. Түүнчлэн  тен­дерт өрсөлдөгчид Улсын цир­кийг 2011 он хүртэл удир­дах ажиллах стратеги төлөв­лөгөөг боловсруулах шалгуур тавьсан байдаг. Үүнд, багийн боловсрол, мэргэжил, ур чадвар, дадлага турш­лагыг сайжруулах, үнд­­сэн үйл ажиллагааны чиг­лэл, хөрөнгийн зориу­лал­­тыг өөрчлөхгүй байх, үндсэн хөрөнгийн ашиг­лалтыг зориулалтын да­гуу сайжруулах, циркийн ур­лагийн урын санг баяжуулан, түгээн дэлгэрүүлж, хөгжүүлэх, үйлчлэх хүрээг тэлэх, хүний нөөцийг хөгжүүлэх, ажилт­нуудын нийгмийн халамжийг сайжруулах, соёлын га­даад харилцаа, хамтын ажил­лагаа­гаа сайжруулах зэрэг багтсан байв. Мэдээж, бусад тендерт өрсөлдөгчөөс илүү стратеги төлөвлөгөө боловсруулсан учраас “Аса консалтинг” компанид хувьчлалыг өгсөн байх учиртай. Гэсэн ч ШӨХТГ-аас гаргасан мэдэгдлээс харвал дээрх шаардлагууд цаасан дээр бууснаас өөрөөр хэрэгжээгүйг илтгэнэ.

Тодруулбал, 2007 оны нэгдүгээр сарын 8-нд “АСА консалтинг” компанийнхан Монголын үндэсний циркийг хувьчилж авах менежментийн гэрээ байгуулан ажиллаж байгаа нь өнөөдрийн байдлаар Өрсөлдөөний тухай болон Хэрэглэгчийн эрхийг хамгаалах тухай хуулийн хэд, хэдэн заалтыг зөрчсөн гэнэ. Тиймээс “АСА консалтинг” буюу  “Рояал плаза” гэж нэрээ өөрчилсөн компанид шаардах бичиг хүргүүллээ. Тухайлбал, ШӨХТГ-ын даргын нэгдүгээр сарын  24-ний өдөр баталсан удирдамжийн дагуу Рояал плазагийн “Аса цирк”-ийн үйл ажиллагаа нь Өрсөлдөөний тухай хууль, Хэрэглэгчийн эрхийг хамгаалах тухай хууль болон холбогдох бусад хууль тогтоомжид нийцсэн эсэхэд хийсэн хяналт шалгалтаар Өрсөлдөөний тухай хуулийн 12 дугаар зүйлийн 12.1.10-т “Хууль ёсны ашиг сонирхолд харшлах болон хэрэглэгчийг хууль бусаар хохироох худалдааны арга хэрэглэх” гэж заасныг зөрчсөн байна. Түүнчлэн, Хэрэглэгчийн эр­хийг хамгаалах тухай хуу­лийн тавдугаар зүйлийн 5.1-д заасан “Хэрэглэгч эрх бүхий байгууллагаас баталсан стан­дарт, техникийн нөхцөл, ба­рилгын болон эрүүл ахуй, ариун цэврийн норм, фар­ма­копей, жор, түүнчлэн хууль тогтоомж,  гэрээгээр то­дор­хойлсон зохих чанар, тоо хэмжээ,   аюулгүйн шаард­лагыг хангасан бараа хэрэг­лэх, ажил, үйлчилгээгээр хан­гуулах  эрхтэй” гэснийг мөн бие­лүүлээгүйг тус газрын улсын байцаагчийн дүгнэлтээр тогтоосон байна. Ингээд Өрсөлдөөний тухай хуулийн 15.1.7-д заасан “Өрсөлдөөний тухай хууль тогтоомжийг зөрчиж гаргасан төрийн захиргааны байгууллага, нутгийн өөрөө удирдах болон нутгийн захиргааны байгууллагын шийдвэрийг хүчингүй болгуулах саналыг холбогдох дээд байгууллага, албан тушаалтан, захиргааны хэргийн шүүхэд гаргаж шийдвэрлүүлэх”  болон 20.2, 20.3.1-т заасныг тус тус үндэслэн, дүгнэлтээр тог­тоо­сон зөрчлийг арилгах та­лаар арга хэмжээ авч ажил­лахыг шаардав. Харин дараах болзлыг ирэх жилийн нэгдүгээр сард багтаан биелүүлээгүй тохиолдолд Өрсөл­дөө­ний тухай хуульд заа­сан захиргааны шийтгэл ногдуулах, холбогдох хууль тогтоомжийн дагуу циркийг хувьчлан худалдсан гэрээг цуцалж, төрийн өмчид буцаан авах асуудлыг эрх бүхий байгууллагад тавьж шийдвэрлүүлэх хүртэл арга хэмжээ авахыг анхааруулжээ.

Үүнд,
-Циркийн үйлчилгээ, үйл ажиллагааг хувьчлан ава­хаас өмнөх байдалд хүрсэн түвшинг бууруулахгүй байд­лаар удирдан зохион бай­гуулж хэрэглэгчдийг цир­кийн урлагийн үйлчилгээгээр хангаж ажиллах
-Циркийг хувьчилж авах үед байгуулсан Улсын циркийг худалдах, худалдан авах гэрээний 1.7-т заасан тооноос цөөнгүй циркийн урлагийн ажилтан, уран бүтээлчийг байнгын ажлын байраар хангах   
-Өөрийн орон тооны бус циркийн урлагийн уран бүтээлчдийг циркийн урла­гийн бэлтгэл, сургуулилт хийх, үзүүлбэр, тоглолт хийх боломжтой байраар хангахдаа циркийн урлагийн нөхцөлд тохирсон, биелүүлж болох нөхцөлийг тавих,
-Менежментийн АСА багийн Улсын циркийн 2007-2011 онд хөгжүүлэх стратеги ба бизнес төлөвлөгөөнд циркийн тоглолтын тоо хэмжээг жил тутам 64-109 удаа байхаар төлөвлөсний дагуу хийж, хэрэглэгч олон нийтэд хүргэх. Ингэхдээ 2014 оныг дуустал циркийн урлагийн тоглолтыг нийт 48-аас доошгүй удаа хэрэглэгч олон нийтэд хүргэсэн байх,
-Улсын циркийн барилга байгууламж, талбайг зориулалтын дагуу ашиглах,
-Зориулалтын бусаар ашиглаж буй циркийн ба­рил­га байгууламж, тал­байг циркийн урлагийн зориу­лалттай болгох шат дараатай арга хэмжээ авах таван  жилийн төлөвлөгөө боловсруулан ирүүлэх,
-Циркийн барилга бай­гууламж, талбайг циркийн ур­лагийн зориулалтын бол­гох талаар эхний ээлжид 2014 оны дотор циркийн ба­рил­гын тавдугаар корпусыг болон гадаа талбайн газ­рыг зориулалтын дагуу болгон сэргээн засварлах, тохижуулах ажлыг зохион бай­гуулан зориулалтын да­гуу ашиглах гэсэн нөхцөл тусгажээ.