Жил бүр уламжлал болгон зохион байгуулагддаг нутгийн зөвлөлийн уулзалт, золголтыг Орхон аймагт зохион байгууллаа. Уулзалтыг Баянхонгор аймгийн ИТХ, ЗДТГ, Эрдэнэт хот дахь Баянхонгор аймгийн нутгийн зөвлөл хамтран зохион байгуулав. Уг арга хэмжээнд аймгийн ИТХ-ын дарга  Д.Ширмэн, аймгийн Засаг даргын орлогч Д.Ганбаяр нараар ахлуулсан 20 гаруй хүний бүрэлдэхүүн, мөн Орхон сумд суугаа Хонгор нутгийн уугуул иргэд оролцсон байна.
Золголтод Дуучин Э.Энх-Эрдэнэ тэргүүтэй залуу уран бүтээлчид болон Эрдэнэт хотод суугаа нутгийн зон олон ЕБС-ийн сурагчид ая дуугаа өргөж, “Хонгорын хурд” МСУХ-ны тэргүүн Д.Мөнх-Эрдэнэ нутгийн зон олонд зориулж, Говийн бүсийн их хурд уралдааны зохион байгуулалтын талаарх мэдээллийг хүргэсэн байна. Баянхонгор аймгийн төв Гандангийн тэргүүн хамба н.Баянжаргал, Энэтхэг улсад суугаа Гэгээнтэний зөвлөх н.Ванданцэрэн нар засал, ном айлдсан аж.
Эрдэнэт хотын Орхон сумд Баянхонгорын уугуул 3000 орчим иргэн 500 гаруй айл өрх оршин суудаг. Нутгийн зөвлөлөөс Шинэ жил, Сар шинийн баярт үйл явдлуудыг хамтдаа цуглан тэмдэглэдэг гэдгийг Нутгийн зөвлөлийн дарга, Монгол Улсын зөвлөх инженер Т.Ринчинжүгдэр энэ үеэр дуулгасан аж. Эрдэнэтчүүд 2014.07.22-26 ны өдрүүдэд зохион байгуулагдах Даншиг наадамд өргөн бүрэлдэхүүнтэй оролцоно гэдгээ илэрхийлсэн байна.