Зүүн аймгийн зарим сумын нутаг дэвсгэрт гарсан олон улсын хөл хориот мал, амьтны гоц халдварт шүлхий өвчний тархалтыг хязгаарлахын тулд нийслэлийн Засаг дарга, нийслэлийн Онцгой комиссын даргын шийдвэрээр Багануур, Багахангай, Налайх, Баянзүрх, Хан-Уул, Сонгинохайрхан дүүргийн нутаг дэвсгэрт өндөржүүлсэн бэлэн байдлын зэрэгт хэсэгчлэн шилжүүлээд багагүй хугацаа өнгөрч буй. Нөгөөтэйгүүр, ОХУ-аас шаардлагатай вакцин хүлээн авснаас хойш шүлхий өвчний тархалт багасгаж байгаа гэсэн мэдээлэл ч гараад буй. Тиймээс нөхцөл байдал ямар байгаа болон цаг үеийн мэдээллийг нийслэлийн Мал эмнэлгийн газрын дарга А.Нарантуяагаас тодрууллаа.

-Хотод шүлхий өвчин зөөвөр­лөгдөн орж ирэхээс болгоомж­лон Хэрлэн, Багахангай, Тэрэл­жийн уулзвар, Налайхын дө­рөв­дүгээр зөрлөг, Баянзүрх, Ни­сэх, Яармаг, Эмээлт, Баруун ту­рууны товчоод гэсэн есөн цэгт ариут­гал, халдваргүйжүүлэлтийн цэг байгуулсан. Өнөөдөр байдал ямар байна?
-Ер нь, шүлхий өвчний тархалт багасч байх шиг байна. Нийс­лэлийн хувьд вакцин ирэнгүүт Улаанбаатарын ойр орчимд нутагладаг малтай айлуудын бүх малыг вакцинжуулалтад хамруулан шаардлагатай бүхий л арга хэмжээг авсан. Байдал сайжирсан.

-Нийслэлийн хувьд хэдэн малыг вакцинжуулалтад хам­руул­сан бэ?
-Энэ сарын 1-нд БНХАУ-д үйлдвэрлэсэн мал, амьтны шүлхий өвчний эсрэг вакциныг хүлээн аваад маргааш орой нь 176 өрхийн 1879 үхэр, 2764 хонь, 3326 ямаа буюу нийтдээ 7869 толгой малд шүлхийгээс сэргийлэх вакцин хийсэн.

-Байдал сайжирч байгаа бол нийслэлийн ойр орчимд байгуулсан есөн цэгийг хэзээ буулгах уу?
-Хөдөө орон нутгаас ирж буй мэдээллээс хамаарна л даа. Ерөн­хийдөө байдал гайгүй болсон гэвэл удахгүй буулгах байх аа.

-Гэхдээ буулгахаасаа өмнө дав­тан вакцинжуулалт хийнэ биз дээ?
-Тэгнэ. Вакцинжуулалтын аж­лыг есөн дүүргийн гурван тосго­ны мал эмнэлэг үйлчилгээний 21 байгууллагын малын эмч, мэргэжилтнүүд хийж байна. Давтан вакцинжуулалтад есөн дүүргийн гурван тосгоны 64611 үхэр, 134616 хонь, 99540 ямаа буюу нийтдээ 298767 толгой малыг хамруулах ёстой юм. Нэг ёсондоо, бэлтгэл ажлаа хангаж байна гэсэн үг.