Монгол Улсын нийт хүн амын 10 хувь нь буюу өнгөрсөн оны арванхоёрдугаар сарын эцсийн тооллогоор  294 908 хүн амьдардаг Баянзүрх дүүрэгт 0-4 насны 30 710, 5-9 насны 24 681, 10-14 насны 23 788, 15-19 насны 23 491 буюу нийт 102 670 хүүхэд амьдарч байна. Тиймээс анх удаа “Хүүхдэд ээлтэй орчин-Хүүхдийн оролцоо” сэдэвт анхдугаар чуулганыг Баянзүрх дүүргийн Хүүхэд, гэр бүлийн хөгжлийн төвөөс санаачлан “Дэлхийн зөн” олон улсын байгууллагын ивээн тэтгэлгээр зохион байгуулав. Чуулганы нээлтэд Баянзүрх дүүргийн Засаг дарга Д.Пүрэвдаваа “Дүүргийн хэмжээнд бүтэн өнчин 660, хагас өнчин 3294 хүүхэд байдаг. Тус дүүргийн нутаг дэвсгэрт хүүхдийн халамж, асрамжийн чиглэлээр үйл ажиллагаа явуулж буй төрийн болон төрийн бус 21 төв хагас, бүтэн өнчин, хараа хяналтгүй 700 гаруй хүүхдийг асран хүмүүжүүлж байна. Үүнээс 30 хувь нь гэртээ буцах боломжтой гэсэн судалгаа байдаг. Хөгжлийн бэрхшээлтэй хүүхдийн дуу хоолойг сонсох, тэдний чөлөөт цагийг зөв боловсон өнгөрөөх, оролцоог нь нэмэгдүүлэх зорилготой, ерөнхий боловсролын сургуульд суралцаж байгаа хүүхдүүдийн дунд тэмцээн уралдаан зохион байгуулж, дүүргийн хүүхдийн холбооны гишүүдтэй уулзаж, хүүхдийн хөгжил, хамгааллын чиглэлээр тэднээс дэвшүүлсэн санал санаачилгыг 2014 оны үйл ажиллагааны төлөвлөгөөнд тусган ажиллаж байна” хэмээн хэлсэн үгэндээ онцолсон юм.

Түүнчлэн тус  дүүргийн Хөдөлмөр эрхлэлт, нийгмийн хөгжлийн асуудал хариуцсан Засаг даргын орлогч Б.Баясах, Нийслэлийн Хүүхэд гэр бүл хөгжлийн газрын дарга Я.Байгалмаа, дүүргийн Хүүхэд, гэр бүл хөгжлийн төвийн дарга Д.Эрдэнэтуяа, Улаанбаатар их сургуулийн гэр бүл судлалын тэнхмийн багш, доктор Б.Оюун-Эрдэнэ, Б.Нандинцэцэг, Н.Уянга, Д.Мягмарсүрэн, Сурагчдын холбооны тэргүүн О.Сэлэнгэ болон албаны бусад хүн  тус чуулганд оролцлоо. Чуулганы үеэр Улаанбаатар их сургуулийн Гэр бүл судлалын тэнхмийн багш нар “Хүүхдэд нөлөөлөх гэр бүлийн орчин түүний өнөөгийн байдал тулгамдаж буй асуудал”, “Хүүхдэд ээлтэй нийгмийн орчинг бүрдүүлэх арга зам”, “Сургуулийн боловсролын орчинг хүүхдэд ээлтэй болгох нь”, “Оролцоонд тулгуурлаж хүүхдийн хөгжлийг дэмжих арга зүй” сэдвээр илтгэл тавилаа. Мөн  чуулганд оролцож байгаа хүүхдүүдийн дунд нээлттэй хэлэлцүүлэг зохион байгуулж, зөвлөмж гаргаж байгаагаараа онцлогтой хэмээн Баянзүрх дүүргийн Гэр бүл хөгжлийн төвийн дарга Д.Эрдэнэтуяа өгүүллээ. Ингээд 2013 онд хийсэн судалгааг танилцуулж байна.    
Хүйсийн байдлаар авч үзвэл эрэгтэй 0-4 насны 15.320, 5-9 насны 12.017, 10-14 насны 11.866, 15-19 насны 11.408 нийт 50.611, эмэгтэй 0-4 насны 15.390, 5-9 насны 12.664, 10-14 насны 11.922, 15-19 насны 12.083нийт 52.059 байна.

Бусад тоон мэдээллийг дурдвал:
Сургууль завсардсан хүүхэд    143
Хөгжлийн бэрхшээлтэй хүүхэд    462
ЕБС-д хамрагдсан хөгжлийн бэрхшээлтэй хүүхэд    1586
Дүйцсэн хөтөлбөрт хамрагдсан хүүхэд    1996
Хагас өнчин хүүхэд    3294
Бүтэн өнчин хүүхэд    660
Харьяалалгүй хүүхэд    30
Хөдөлмөр эрхэлж буй хүүхэд    24
Эрүүгийн хариуцлага хүлээж буй хүүхэд    54
Гэмт хэрэгт холбогдсон хүүхэд    113
Гэмт хэргийн хохирогч болсон хүүхэд    167
Хичээлээс гадуур клуб, дугуйлан, хөтөлбөрт хамрагдсан хүүхэд    7159
Хүүхдийн амралт, сувилалд хамрагдсан хүүхэд /Эмчилгээ сувилгаа шаардлагатай хөгжлийн бэрхшээлтэй хүүхдийн унааны хөнгөлөлт/    53
Асрамж халамжийн төвийн хүүхдүүд /20 төвд/    958
Өргөдөл, гомдол, хүсэлт гаргасан хүүхэд    90
Хүүхдийн өөрөө удирдлагын байгууллагын гишүүнчлэлтэй хүүхэд    538
Хүүхэд хамгааллын хамтарсан багийн үйлчилгээ авсан хүүхэд    358
4-дээш хүүхэдтэй өрхийн тоо 2162
Казах хүүхдийн тоо    268