Автомашины албан ёсны “хулгайч” гэж нэрлэгдэх бол­сон ачилтын компаниуд жолооч нарын хэтэвчийг сэгс­рэх болсоор удаж байна. Түр зогсохыг хориглосон буюу зорчих хэсгийн нэгдүгээр эгнээнд зогссон жолооч нарын машиныг ачихаар шийдвэрлэсэн эл журам олон жолоочийн уур ундууцлыг төрүүлдэг. Өнгөрөгч зунаас эхлэн нийслэлийн Замын цагдаагийн газар хэд, хэдэн хувийн аж ахуйн нэгжтэй гэрээгээр ачилт гүйцэтгүүлэх болсноор дээрх албан ёсны автомашины “хулгай” эрчимжсэн гэхэд болно. Хэрэв хориотой газар зогссон бол машиныг нь Гурвалжингийн гүүрний хашаандаа аваачаад тавьчихна.
Нэгэнт л машинаа ачуулсан бол дор хаяж 70 мянган төгрөг төлөхөөс нааш унааныхаа барааг харахгүй. Энэ нь, жолооч нарыг хүнд байдалд оруулах болсон нь нууц биш. Машин унасан бүхний халаасанд 70 мянган төгрөг бэлэн байх нь ховор. Амьжиргаагаа арай хийн залгуулж байгаа өнөөгийн нийгэмд энэ татаас арай дэндсэн болохыг олон хүн хэлдэг. Түүнчлэн Улаанбаатар хотод гадна зориулалтын авто зогсоолтой объект хэд байдаг билээ гээд бодоод үзэхэд ч цагаа олоогүй ажил шиг санагдана.
Нөгөөтэйгүүр, хаа ч хамаагүй машинаа орхиод алга болдог, бусдынхаа хөдөлгөөнд саад учруулдаг сахилгагүй жолооч нартай хатуухан арга хэмжээ тооцох нь зүйн хэрэг байх талтай. Гэвч автомашиныг нь ачиж явдаг болсноор үнэхээр автозамын хөдөлгөөн эмх цэгцэндээ орсон уу гэвэл сайжирсан зүйл ажиглагдахгүй л байна. Зогсоол хайн нэг уулз­вараас нөгөө хүртэл явж, байшинг хэдэнтээ тойрч бухимдсан жолооч нар зогсоолоо булаацалдан барь­цалдахаас наагуур болох нь цөөнгүй.  Багахан зог­соол дээр пиг чихсэн нь чихэ­р дээр шавсан ялаа шиг хараг­дах нь ч бий. Үнэн хэрэгтээ, энд тэнд очихоор зогсоол нь үргэлж дүүрэн байдаг нь өнөө­гийн төрх байхад яалтай ч билээ.
Тэгвэл автомашин ачсаны төлбөрт  машины моторын баг­таамжаас шалтгаалан 70.000-80.000 төгрөг авч бай­гаа нь хууль зөрчсөн байх тал­тай гэх мэдээлэл сүүлийн үед интернэтээр тархах боллоо.
Анх 2005 онд тухайн үеийн Хууль зүй дотоод хэр­гийн сайд Ц.Нямдоржийн  94 дүгээр тушаалын дагуу “Зо­риулалтын чирэгч автомашин ашиглан тээврийн хэрэгслийг зөөж шилжүүлэх журам” баталсан байдаг. Өөрөөр хэлбэл, зориулалтын чирэгч автомашин ашиглан тусгай хашаа талбайд шилжүүлэхтэй холбогдсон харилцааг зо­хи­цуулахад энэ журмыг удирд­лага болгох ёстой ч нийс­лэлийн Засаг дарга зөрч­сөн захирамж гаргасан гэнэ. Өөрөөр хэлбэл, төлбөр хураамж авах асуудлыг Цаг­даагийн Ерөнхий газрын дарга батлах ёстой байтал Замын хөдөлгөөний удирд­лагын төвийн дарга Л.Бат­цоожид даалгасан нь  буруу байж. Хууль зүйн яамнаас баталсан журмын 4.1.1,  4.1.2-т хураамжийг зах зээлийн тухайн үеийн үнэ ханшийг үндэслэн нэгж кило­мет­рээр тооцон авах, дууд­лагаар очих, журмын ха­шаанд хүргэх болон ачиж буулгах зардлын нийлбэрээр тооцно гэж заасан ч Замын хөдөлгөөний удирдлагын төвийн дарга Л.Батцоож үл харгалзан автомашины моторын багтаамжаар нь ангилан 70-80 мянган төгрөг хэмээн дур мэдэн тогтоосон нь журам зөрчсөн үйлдэл болжээ.
Дунд оврын ачигч авто­машин ирж, буцахдаа ихдээ л 20 километр явдаг гэж бодоход 70, 80 мянган төгрөгийн зардал гарахгүй нь мэдээж. Энэ мөнгөний ихэнх нь гэрээгээр ачдаг хувийн компаниудад ордог нь ч дамжиггүй. Иймэрхүү байдлаар сэтгэж, тооцсон иргэд ШӨХТГ-т гомдол гаргаад ч нааштай хариу авч чадаагүй аж. Энэ талаар ШӨХТГ-ын Хэрэглэгчийн эрх ашгийг хамгаалах хэлтсийн мэргэжилтэн С.Энхбатаас тод­руулахад, “Албан ёсны гэ­рээтэй таван аж ахуйн нэгж энэ ажлыг гүйцэтгэдэг юм байна билээ. Тэдэнтэй хол­боо­той болон авч байгаа хураам­жийн асуудлаар манайд олон гомдол ирж байгаа. Тиймээс нэгдсэн шалгалт явуулахаар төлөвлөн удирдамж боловс­руулсан. Үүнтэй холбогдуулан Нийслэлийн Засаг даргад хандсан албан бичиг бэлдсэн байгаа” гэв.
Энэ үнэхээр хууль зөрчсөн асуудал мөн эсэхийг тодруулахаар хэд хэдэн га­зарт утас цохисон боловч ал­баныхантай холбогдож чад­­­­сангүй. Нийслэлийн за­мын цагдаагийн газрын олон нийт­тэй харилцах мэр­гэ­жилтэн нь “Манайд хамаагүй” гэсэн хариу өгсөн бол Замын цаг­даагийн Удирдлагын тө­вөөс “дарга байхгүй” гэсэн юм.
Юутай ч, ШӨХТГ-аас шал­гаад жолооч нарыг хэцүү­дүүл­дэг энэ хураамж хэр үндэс­лэлтэй болох талаар удахгүй мэдээлэх биз ээ.