Монголбанкны гадаад валютын дуудлага худалдаагаар банкууд өчигдөр 14.8 сая ам.доллар худалдан авах санал ирүүлснээс төв банк 1780.10 төгрөгийн хаалтын ханшаар 11.8 сая ам.доллар худалджээ. Харин юанийн дуудлага худалдаагаар банкууд 16 сая юанийг 285.50-286.50 төгрөгийн ханшаар худалдан авах санал ирүүлсэн ч, төв банк оролцоогүй аж. Энэ өдрийн ээлжит гадаад валютын своп, форвард хэлцлээр банкууд 51.0 сая ам.доллар худалдан авах төгрөгийн своп хэлцэл, 15 сая юанийн своп хэлцэл хийх санал тус тус ирүүлсэн тул Монголбанк саналыг 100 хувь биелүүлэн, гадаад валютын дотоодын захад 51 сая ам.доллар, 15 сая юань нийлүүлсэн байна. Дашрамд, гадаад валютын дуудлага худалдаа гэдэг нь валютын дотоодын захын үйл ажиллагааг ил тод, нээлттэй явуулах, үр ашгийг нэмэгдүүлэх, төгрөгийн ханшийн тогтвортой байдлыг хангах, зах зээлийн зарчмаар тодорхойлох зорилгоор Монголбанкнаас захад оролцох нэг арга хэрэгсэл аж. Төв банк долоо хоног бүрийн мягмар, пүрэв гарагт тогтмол зохион байгуулдаг дуудлага худалдаанд зөвхөн банкны үйл ажиллагаа эрхлэх зөвшөөрөлтэй, Монгол Улсын нутаг дэвсгэрт үйл ажиллагаа явуулж буй банкууд оролцдог юм.