Ардчилсан намаас сар бүрийн эхний долоо хоногийн пүрэв гаригт зохион байгуулдаг “4-11” сэтгүүлчидтэй хийх уулзалт өнөөдөр боллоо. Энэ удаа “Smart city” буюу “Ухаалаг хот” сэдвээр мэдээлэл өгсөн юм. АН-ын “Монгол хүн 2020” мөрийн хөтөлбөр болон Монгол Улсын Ерөнхийлөгчийн дэвшүүлсэн  “Том төрөөс ухаалаг төр рүү” санаачилгыг дэмжиж Нийслэлийн ИТХ-аас “Ухаалаг хот” хөтөлбөр хэрэгжүүлэх шийдвэр гаргасан. Ухаалаг засаглал болон эдийн засаг, иргэд, үйлчилгээ, орчин, амьдрал гээд цөм “ухаалаг” байх нь дээрх зорилгод хүрэх үндэс суурь болох аж. Эдгээрийг 2014-2020 онд хэрэгжүүлэхээр төлөвлөжээ. Ухаалаг хот нь зөөлөн дэд бүтэц, төрийн үйлчилгээг цахимжуулах, ажилтны цахим ажлын байр, иргэний вэб нэг цонх, шилэн данс, шилэн тендер, шуурхай удирдлагын төв, видео болон аудио холбооны сүлжээ, мэдээллийн сүлжээ, дата төв байгуулах зэрэг цогц үйлчилгээнээс бүрдэх юм. Хөтөлбөрийн зорилго нь шинэ зууны хотын хөгжлийн чиг хандлага, технологийн дэвшил, иргэдийн хүсэл шаардлага, бизнесийн орчны өөрчлөлтийг шуурхай мэдэрч оновчтой шийдвэрлэж чадах боломж юм. Мөн цомхон бүтэцтэй, ойлгомжтой дүрэм журамтай, соёлтой шуурхай үйлчилгээтэй, технологижсон, ажиллаж амьдрахад таатай ухаалаг хотыг бий болгох явдал. Технологижсон Улаанбаатар гэдэгт wireless сүлжээ, цаг агаарын онлайн чанар хэмжигч, онлайн хяналтын камер, хүний эрүүл мэндийг онлайнаар хэмжигч, тодорхойлогч, интернэтээр хянадаг автомашин, таблет, e-map, e-book  гэх мэт зүйлс багтжээ.
Ээлжит уулзалтад АН-ын Ерөнхий нарийн бичгийн дарга Ц.Оюундарь, нарийн бичгийн дарга О.Чулуунбилэг, НИТХ-ын дарга Д.Баттулга, , Нийслэлийн АН-ын дэд дарга Ц.Баатархүү нар оролцлоо. “Ухаалаг Улаанбаатар” хөтөлбөр нь манай нийслэл шиг орчин үеийн метрополитан буюу их хотод зайлшгүй байх ёстой зүйл бөгөөд хуучин аргаар шийдэх боломжгүй суурь асуудлыг шийдвэрлэх шинэ арга зам гэдгийг онцолж байв.