Төв Америкийн орнуудад анх удаа метро нээгдсэн тухай “Telesur” суваг мэдээлж байна. Панамын түүхэнд анх байгуулагдсан метроны нээлтэд тус улсын Ерөнхийлөгч Рикардо Мартинелли оролцжээ. Панамын метро нь 14 км-ийн урттай, 13 буудалтай. Панам улс метрогоо 1,8 тэрбум ам.долларын өртгөөр 38 сарын дотор байгуулсан аж.
Метро байгуулснаар урьд нь хоёр цаг явдаг байсан замыг 23  минутын дотор туулах боломжтой болсон тухай Ерөнхийлөгч Рикардо Мартинелли өгүүлсэн байна.
Метро нь нээгдсэнээсээ хойш эхний нэг сарын дотор зорчигчдыг дасгахын тулд үнэгүй үйлчлэх болжээ. Хачирхалтай нь, Панамын сөрөг хүчин үнэгүй үйлчлэх болсон тухай шийдвэрийг эрс эсэргүүцжээ. Тэд метрогоор зорчих тасалбарыг үнэгүй болгосон нь ирэх сард явагдах парламентын сонгуулийн өмнөх сурталчилгааны ажил гэж үзжээ.