Хяналтын шатны шүүхээс, “Гал үндэстэн” холбооны тэргүүн Ц.Мөнхбаярт долоон жил, Г.Болдбаатарт зургаан жил нэг сар, Д.Төмөрбаатарт 10 жил зургаан сар, Ж.Ганболдод нэг  жил, Н.Дашцэрэнд  хоёр жилийн хорих ял тус тус оноож О.Самбуу-Ёндон, Б.Гантулга нарыг гэм буруугүйд тооцсон анхан шатны шийдвэрийг хэвээр үлдээв.
Анхан шатны шүүхээс Ц.Мөнхбаяр нарыг Эрүүгийн хуулийн 177.2 буюу зохион байгуулалттайгаар бүлэглэн бусдад хор уршиг учруулсан, 149.3 буюу зохион байгуулалттай бүлэг онц их хэмжээний эд хөрөнгө авахаар далайлган сүрдүүлсэн, 185.1.2 буюу галт зэвсэг байлдааны хэрэгсэл хууль бусаар олж авсан гэх үндэслэлээр ял оноосон. Харин давж заалдах шатны хурлаар хэргийг хэлэлцэж зохион байгуулалттай гэх заалтыг хассанаар ийнхүү шийдвэр гарчээ.
Хяналтын шатны шүүх хуралд даргалагч шүүгчээр Л.Даваасүрэн, шүүгчээр Н.Батсайхан, Ц.Оч, улсын яллагчаар Н.Бадамцэцэг, Т.Оргил-Очир, өмгөөлөгчөөр Б.Манлайжав, Б.Бэхбат, Д.Энхбаяр, Л.Данзанноров, Т.Мөнхдэлгэр нар оролцлоо.