Япон улсын Засгийн газраас манай улсад хэрэгжүүлж буй “Өвсний үндэс” хөтөлбөрийн хүрээнд Дорнод аймгийн Халх гол суманд гурван төсөл хэрэгжүүлэх болов.

Эдгээр нь “Өвсний үндэс” хөтөлбөрийн 2014 оны санхүүжилтийн хүрээнд хийж буй  анхны ажил гэдгээрээ онцлогтой.  Халх гол сум дахь сум дундын эмнэлэг,  цэцэрлэг, хөгжлийн бэрхшээлтэй хүүхдүүдийн Хүүхэд хөгжил төвийн байранд их  засвар хийх аж. Төслүүдийн  хүрээнд нийт 269 мянга 695 ам.долларын тусламж үзүүлэх юм байна. Япон улсын Засгийн газраас хөрөнгийг нь гарган, хэрэгжүүлдэг “Өвсний үндэс” хөтөлбөрийг 1990 оноос эхлүүлж, өдгөө 28.9 сая  гаруй ам.доллараар 445 төсөл  хэрэгжүүлжээ.  Элчин  сайд  Такэнори Шимизү “Өнгөрсөн  жилийн  есдүгээр сард Дорнод аймгийн Чойбалсан хот болон Халхгол  сумтай  танилцах  завшаан  тохиосны  дүнд эдгээр төслийг хэрэгжүүлэхээр болсон юм. Японы ард  түмнээс  Монголын  иргэдэд  үзүүлж ирсэн тусламж нь хоёр  орны найрсаг, үр өгөөжтэй харилцааг бий болгохын зэрэгцээ Монгол Улсын хөгжилд хувь нэмрээ оруулж байгаа хэмээн итгэн, бахархдаг” гэлээ.