Ойг тохиолдуулан Монгол Улсаас Швейцарийн Холбооны Улсад суугаа ЭСЯ-наас тус улсын нийслэл Берн хотноо зохион байгуулсан хүлээн авалтын үеэр элчин сайд В.Пүрэвдорж хэлсэн үгэндээ хоёр талын харилцаа, хамтын ажиллагааны замнал, өнөөгийн байдал, ирээдүйн төлөвийг үнэлж, Швейцар Улс Монгол Улстай дипломат харилцаа анхлан тогтоосон өрнөд Европын орнуудын нэг, худалдааны социалист бус анхны түнш орон гэдгийг онцлов.
Эдүгээ Монгол, Швейцарын хамтын ажиллагаа хөдөө аж ахуй, хөдөөгийн хөгжил, бичил уурхай, мэргэжлийн боловсрол, сургалтын салбарт, мөн сайн засаглалыг бэхжүүлэх чиглэлээр өргөжин тэлж байна. Мөн Монголд үйл ажиллагаа явуулж эхэлсний 10 жилийн ойгоо энэ өдрүүдэд тэмдэглэж буй Швейцарын хөгжлийн хамтын ажиллагааны агентлагаас манай оронд амжилттай хэрэгжүүлж байгаа олон төсөл, хөтөлбөрийн ач холбогдлыг элчин сайд цохон тэмдэглэв.
Хүлээн авалтад Швейцарийн ГХЯ, Парламент, Швейцарын хөгжлийн хамтын ажиллагааны агентлаг, Эдийн засгийн хамтын ажиллагааны яам, Харьяатын алба, ЕАБХАБ-ын алба зэрэг байгууллагын албан тушаалтнууд, мөн Монгол, Швейцарийн хамтын ажиллагаанд хувь нэмрээ оруулж буй швейцар иргэдийн төлөөлөл уригдан оролцов.
