Бурхан Буддагийн эхийн хэвлийгээс мэндэлсэн, гэгээрлийн хутгийг олсон, нирваан дүрийг үзүүлсэн 3 үйл явдал давхцдаг Их Дүйчэн өдрийг Бурханы шашин дэлгэрсэн Азийн болон Европын улс орнуудад баярын өдөр болгон тэмдэглэдэг уламжлалтай.
НҮБ-ийн Ерөнхий Ассемблейгаас жил бүрийн зуны тэргүүн сарын шинийн 15-ны тэргэл сартай өдөр нь бүх Бурханы шашинтнуудын хувьд хамгийн чухал хүндэтгэлтэй өдөр болоод зогсохгүй, НҮБ-ийн төв байгууллага болон Улс орнууд дахь төлөөлөгчийн газрууд Олон улсын өдөр болгон тэмдэглэж байх тухай тогтоол гаргасан юм. Түүнчлэн жил бүр НҮБ-ийн Ерөнхий нарийн бичгийн дарга Дүйчэн өдөрт зориулсан илгээлтийг бурханы шашинтнуудад зориулдаг нь энэхүү баярын үнэ цэнэ, утга учрыг тодоор харуулж байна.
Их Дүйчэн өдрийг тэмдэглэх нь зөвхөн шашин номын зан үйл, хүрээ хийдийнхний ажил хэрэг төдий биш, манай нийт иргэд, үндэстний сэтгэл санааны ариусал, гэгээрэл, эв нэгдлийн өдөр байж, шашин соёлын баяр болж өргөжин тэлж байгаа нь ёс суртахуунтай амьдрах өнөө цагийн нийтлэг ёсонд чухал ач холбогдолтой юм.
Энэ жилийн 6 сарын 13-ны Их Дүйчэн өдрийг МБШТөв Гандантэгчэнлин хийд, бурханы шашины чиглэлээр үйл ажиллагаа явуулдаг төрийн бус байгууллага, төвүүд хамтран БУРХАН БАГШИЙН ИХ ДҮЙЧЭН ӨДРИЙН БАЯР болгон тэмдэглэж, нийтийн сайн сайхны төлөө энэрэнгүй сэтгэлээр, эвлэлдэн нэгдэж улс орноо хөгжүүлэх уриалгыг дэвшүүлж байгаа юм.
Бурхан багшийн Их Дүйчэн өдрийн баяр нь үндсэн гурван хэсэгтэй.
- МБШТөв Гандантэгчэнлин хийдэд зохион байгуулагдах Бурхан багшийн ринсэл залах болон шашин, соёлын арга хэмжээ. Өглөөний 06:00-17:00 цаг хүртэл
- МБШТөв Гандантэгчэнлин хийдээс Чингисийн талбай хүртэл төв зам дагуу үргэлжлэх Энэрэнгүй сэтгэл-Эв нэгдэл 1080 хүний парад. 17:00-19:00 цаг хүртэл
- Чингисийн талбайд зохион байгуулагдах Майдарын зүрхэн шүтээн, Бодь модийг олон нийтэд нээлттэй танилцуулах үйл ажиллагаа, Бясалгал флаш моб, урлагийн тоглолт.
Тус баярт зориулан Их Майдар сангаас Чингисийн талбай Бурхан багшийн ринсрэл зүрхэн шүтээн, Монгол улсад анх удаа ургуулж буй Бодь модийг олон нийтэд танилцуулж 14 хоногийн турш сүсэгтэн олон эрднийн шүтээнд мөргөх, Бодь модны дэргэд бясалгал хийх боломжийг олгох юм. Бурханы ариун нандин ринсрэлд мөргөн залбирахын утга учир нь хүн сэтгэл санаагаа ариусгах, оюун ухаанаа хөгжүүлж, оюун ухааны гайхалтай түвшинд хүрэх зоригдол болоод зогсохгүй муу заяаны зовлонгоос гэтлэн аливаа гай тотгор, өвчин зовлонгоос ангижирч, ажил vйлс нь дэвжин дээшлэх гайхалтай учрал тохиол билээ.
Дэлгэрэнгүй
мэдээллийг: 98113045; 77112233
https://www.facebook.com/ikhduichen
