Орос-Монголын иргэд  ирэх оны нэгдүгээр сараас харилцан визгүй зорчиж магадгүй гэж Буриад Улсаас  Улаанбаатарт суугаа  төлөөлөгчдийн газрын тэргүүн Сергей Будажаповын хэлснийг "Байкал Daily" иш татан мэдээлжээ. Хоёр орны иргэдийг харилцан визгүй зорчуулах талаар олон жилийн турш ярьж байгаа ч энэ 2014 оны тавдугаар сард Монгол Улсын ерөнхийлөгч Ц.Элбэгдрж ОХУ-ын ерөнхийлөгч Владимир Путинд хандаж энэ асуудлыг тусгайлан анхаарч үзэхийг хүссэн нь бас нэг алхам болсон юм.
Сергей Будажаповын даваа гарагт мэдэгдсэнээр бол визийн дэглэмийг өөрчлөх хэлэлцээрт энэ зун гарын үсэг зурж магадгүй байна.

“Халхын голд япончуудыг зөвлөлт монголын цэрэг ялсны 75 жилийн ойгоор ирэх наймдугаар сарын 22-нд ОХУ-ын ерөнхийлөгч Владимир Путин Монголд ирэх гэж байна. Магадгүй харилцан визгүй зорчих хэлэлцээрт энэ үеэр гарын үсэг зурж мэднэ. Эцсийн эцэст монголчууд үүнийг өөрсдөө санаачилсан” гэж Буриад улсаас Улаанбаатарт суугаа  төлөөлөгч  хэлжээ.
Түүнийхээр бол ийм хэлэлцээрт гарын үсэг зурвал шинэ оны эхнээс хэрэгжиж эхлэх юм байна. Будажапов бас “Манай хөршүүд ямар ч нөхцөлд тайван, нэг их яардаггүй талын араншинтай улс шүү дээ” гэж анхааруулжээ хэмээн sibinfo.su сайтад бичжээ.