Хонгор суманд цианидын хордлогын улмаас хордож нас барсан гэх 80 гаруй хүний ар гэрийг төлөөлөн “Нэгдсэн Монгол хөдөлгөөн”, “Гал үндэстэн холбоо”, “Хохирогчийн холбоо” зэрэг иргэний хөдөлгөөн нэгдэж, эрх баригчдаас оршуулгын зардал нэхэмжиллээ. Иргэний хөдөлгөөний тэргүүлэгчид хэлэхдээ “Одоогоос долоон жилийн өмнө Хонгорын цианидын хордлого хэмээх аймшигт гамшиг нүүрлэн найман настай балчираас наян настай хөгшид хүртэл янз бүрийн өвчин эмгэгт нэрвэгдэж, 60 ураг зулбаж, гаж хөгжилтэй хүүхэд,төл төрж хорт хавдар ихээр тархан ундны усны хомсдолд орж байсан. Тэр үед 80 гаруй хүн хордлогоос үүдсэн хорт хавдраар нас барж, нэг айлын дөрвөн хүн өөд болсон тохиолдол ч гарсан. Хонгорчууд өнөөдөр улам цөөрсөөр хохирлоо барагдуулах, эрх ашгаа хамгаалах гэсэн дуу хоолой нь бүдгэрсээр байна.Төр засаг, эрх баригчид анагааж эдгээж чадалгүй нас барсан хүмүүсийнхээ оршуулгын зардлыг ядаж өгөөч ээ! Эс бөгөөс хохирогчдын ар гэр оршуулгын зардал нэхэн нэгдэх болно” хэмээн мэдэгдлээ.
