Өнгөрсөн амралтын өдрүүдэд Хангайн бүсийн зөвлөлгөөнийг Архангай, Өвөрхангай, Баянхонгор, Хөвсгөл аймагт зохион байгуулсан. Зөвлөлгөөнөөр МАХН-ынхан социаль демократ үзэл баримтлалын талаархи ойлголт, энэ үзэл баримтлалын давуу талын тухай хангайн бүсийнхэнд сурталчлан таниулахын зэрэгцээ 2012 оны сонгуулиар дэвшүүлсэн мөрийн хөтөлбөрийн хэрэгжилтдээ үнэлэлт дүгнэлт өгчээ.
Тус намын удирдлагууд хангайн бүсийн гишүүддээ УИХ дахь “Шударга ёс” эвслийн бүлгийн үйл ажиллагаа, МАХН-ын Удирдах ажилтны зөвлөлгөөнөөс гаргасан шийдвэр, тогтоол түүний хэрэгжилтийн талаар мэдээлэл өгч тус намд тулгамдаж буй асуудлын талаар харилцан санал  солилцжээ. Тэд төвийн бүсийн зөвлөлгөөнийг энэ сарын 15-нд хийх юм байна.
Мөн үеэр МАХН-ын удирдлагуудын зүгээс мэдэгдэл гаргасанаа танилцуулжээ. Уг мэдэгдэлд, “Улс төрийн зорилгоор дээрээс өгсөн даалгаврыг хууль хяналтын байгууллагын зарим ёс суртахуунгүй ажилтан хэрэгжүүлэхийн тулд илт хууль зөрчсөн үйл ажиллагаа явуулж байгааг МАХН эсэргүүцэж байна.Сүүлийн үед нам дамжсан улс төр, бизнесийн бүлэглэл, тэдний гар хөл болсон хууль хяналтын байгууллагын ёс суртахуунгүй ажилтнууд нийлж, дахин МАНАН байгуулж, улс орны байгалийн баялгийг урьд нь гадаад, дотоодын олигархиудад тарааж өгсөн хууль бус, ёс суртахуунгүй, Монгол Улсын тусгаар тогтнол, хөгжил дэвшилд хор хөнөөлтэй үйл ажиллагаагаа сэргээн үргэлжлүүлэхийг санаархаж, энэхүү явуургүй зорилгодоо хүрэхийн тулд өөрсдөд нь “саад” болж болзошгүй гэж үзсэн улс төрийн нам, улс төрчдийг намнан хэлмэгдүүлэх бусармаг ажиллагааг идэвхжүүлж байгааг эрс эсэргүүцэж байна” гэжээ.