“Хууль зүйн сайддаа хүртэл гүйцэтгэх ажиллагаа явуулдаг болж, үүнийг бид өөрчлөх ёстой” гэж Х.Тэмүүжин сайд хэвлэлээр, телевизээр ярьж байсан нь саяхан. Тэрээр нэрийг нь онцолж хэлээгүй ч оноож яриад байсан хүн нь Засгийн газрын шийдвэрээр өнөөдөр ажлаасаа буулаа.

Цагдаагийн ерөнхий газрын дарга, генерал Б.Билэгтийг огцруулж, түр орлон гүйцэтгэгчээр тэргүүн дэд дарга Ц.Баатаржав хурандааг томилов. Сүүлийн нэг жилийн турш Б.Билэгтийг ажлаас нь чөлөөлөх тухай яриа үе үе гарсан. Үүнд, дараахь шалтгаан бий. Салбарын сайд Х.Тэмүүжин эрх зүйн цогц шинэчлэлийн ажил хийхээр төлөвлөсөн, эхлүүлсэн. Гэвч ЦЕГ-ын удирдлагууд түүнд нь тааламжгүй хандаж байгааг хэдэнтээ илэрхий хэлсэн удаатай. Түүнээс хойш “Б.Билэгт дарга намайг мөшгиж, хуульд нийцэхгүй аргаар тагнаж чагнасан” хэмээн прокурорт, цагдаагийн газарт ч гомдол гаргасан. Асуудал даамжирч Хууль зүйн сайдын оролцоотойгоор, Засгийн газрын шийдвэр гарч Б.Билэгтийг ажлаас нь чөлөөллөө. Өнгөрсөн хугацаанд сайд олон нийтийн өмнө хэд хэдэн удаа ил гарч, ярьж байсан бол Б.Билэгт нэг ч үг дуугаралгүй явсаар халагдсан дүр зураг харагдана.

Харин болсон үйл явцын төгсгөлд хуулиа зөрчдөг хууль зүйн сайдтай байхад Б.Билэгтийг халаад салбар сайжрах уу гэж асуух нь олон байна. Хурандаа нар руу нясалсан чулуу Б.Билэгтийн зулай дээр уналаа гэж хэлэх нэгэн ч байгаа бол “Алтангадас” фракц МоАХ-ны гишүүндийг шахаж эхэллээ гэж харах хүмүүс ч бий аж.