Халх голын тулалдааны мөрөөр эрэн сурвалжилдаг Буриадын “Шилүүс” отрядынхан 1939 онд Халх голын байлдаанд оролцож байсан нэг танкийг дурсгал болгон хил давуулах зөвшөөрөл хүсч байгаа юм байна. Отрядын удирдагч Владимир Ефремов “Монголд хийсэн хайгуулынхаа явцад бид ийм техник, зэвсэг олон байгааг харсан. Зарим нь бүр гудамжинд ил зогсч байна билээ. Тэгэхээр эдний нэг нь Буриадын нийслэлд Халхын голын дайчдын дурсгалд зориулан босгох цогцолборт жинхэнэ үнэтэй үзмэр болно. Монголын дорнод хилд 75 жилийн өмнө болсон байлдаанд Буриадын 16 мянган хүн оролцсон нь зөвлөлтийн бусад бүс нутгийнхаас хамгийн их нь байсан юм. Үүнээ дагаад ч маш их хохирол амссан. Өнөө хэр манай буриад нутгийн 2000 цэрэг ор сураггүй байгаа юм” гэж ярьсан байна.

Жил бүр Монголын дорнод хязгаарт ирж ажилладаг “Шилүүс” отряд есөн жилийн хугацаанд 51 орос цэргийн шарил олж шилжүүлэн хүндэтгэлтэйгээр оршуулжээ. Владимир Ефремов “хамгийн гол нь бид эх орон нэгтнүүдийнхээ нэр усыг мэдмээр байна. Энэ л хамгийн чухал. Тэр үед манай цэргүүд улаан армийн дайчны үнэмлэх, ялгах тэмдэг ч үгүй байсан. Тэгэхээр одоо бол ганц найдлага нь хувийн эд зүйлийг нь л олох” гэжээ.  Үнэхээр ч эрэн сурвалжлах отряд Халхын голоос зэвсэг, хувцасны үлдэгдэл, дарцаг, дашмаг, эвхдэг хутга гээд олон зүйл олжээ. Мөн японы шар айрагны аяга, үзэг ч олдог байна. Бүр үнэртэй усны үлдэгдэлтэй сав ч олсон гэнэ.

Бид олсон зүйлээ Халхын голын байлдааныд зориулсан цорын ганц музей болох Дорнод аймгийн Сүмбэр суманд байдаг музейд л өгдөг. Яахав Улан-Үдэд авчирвал сургуулиудын юм уу, номын сангийн дэргэдэх музейд л өгөх юм даа.
Ингээд тэр үеийн зөвлөлтийн зэвсэглэлд байж, Халхын голын дайнд оролцсон нэг танкийг монголоос гаргах зөвшөөрөл хөөцөлдөөж байгаа юм байна.