МАН-ын Удирдах зөвлөл өчигдөр хуралдаж, Ерөнхий сайдад нэр дэвшигчийн асуудлыг хэлэлцсэн. Тус хурлаас гарсан шийдвэрийг МАН-ын дарга М.Энхболд, тус намын Ерөнхий нарийн бичгийн дарга Ж.Мөнхбат, УИХ дахь МАН-ын бүлгийн дарга С.Бямбацогт нар өнөөдөр Төрийн ордонд албан ёсоор танилцууллаа.

 МАН-ын дарга М.Энхболд энэ үеэр, "Ардчилсан намаас энэ сарын 17-ны өдөр МАН-д Монгол Улсын Ерөнхий сайдад нэр дэвшигч Чимэд овогтой Сайханбилэгийн талаар зөвшилцөх бичгийг Үндсэн хуулийн 33 дугаар зүйлийн 2 дугаарт заасаны дагуу албан тоот ирүүлсэн. Ингээд 17-18-ны өдөр МАН-ын Удирдах зөвлөл, УИХ дахь намын бүлэг тус тусдаа хуралдаж, өчигдөр орой Удирдах зөвлөлийн хурал шийдвэр гаргалаа. Удирдах зөвлөлийн хурлаас Ерөнхий сайдад нэр дэвшигчийн талаар ирүүлсэн зөвшилцөх саналыг хэлэлцээд, улс орны нийгэм, эдийн засгийн байдлыг өнөөдрийн хямралд хүргэсэн, улс орныг өрийн дарамтад оруулсан шинэчлэлийн гэх нэртэй, огцорсон Засгийн газрын хэрэг эрхлэх газрын даргаар ажиллаж байсан энэ хүнийг шинээр байгуулагдах Засгийн газрын тэргүүнээр томилох саналыг зарчмын хувьд дэмжих боломжгүй гэж үзсэн. Шинээр байгуулах Засгийн газар Монгол орны эдийн засаг, нийгмийн амьдралд тулгамдсан олон асуудлыг шуурхай, түргэн шийдвэрлэж, шинэ арга барил, санаа гаргаж ажиллах ёстой. Өмнөх Засгийн газрын алдаатай бодлогуудыг засч залруулах ёстой. Энэ асуудал бол шинээр байгуулагдах Засгийн газрын хамгийн чухал зорилт учраас өмнөх Засгийн газарт хэрэг эрхлэх газрын даргаар ажиллаж байсан хүн бол энэ тавигдаж байгаа шаардлагыг хэрэгжүүлж, биелүүлж чадахгүй гэж үзэж байна. Бид улс орны өмнө тулгамдаж байгаа асуудлыг шийдвэрлэх, улс төрийн болон эдийн засгийн тодорхой мэдлэг, туршлагатай, УИХ дахь бүлгийнхээ дэмжлэгийг авч чадахуйц, УИХ-д байгаа улс төрийн намуудтай ойлголцож, ажиллаж чадах дараагийн хүнийг дэвшүүлбэл, зөвшилцөхөд бэлэн байна" гэж мэдэгдлээ.

Мөн МАН-ын Удирдах зөвлөлийн шийдвэрийг УИХ-ын дарга, Ардчилсан намын дарга З.Энхболдод гардуулж өгсөн гэдгээ хэллээ.