УИХ-ын чуулганы нэгдсэн хуралдаанаар МАН-аас томилогдсон 6 сайдыг огцруулах асуудлыг хэлэлцэж, дэмжлээ.

Сайд нарыг огцруулах тогтоолын төслийг Ерөнхий сайд Ч.Сайханбилэг танилцууллаа. Тэрбээр, Ардчилсан нам, МАН хооронд 2014 оны 12 дугаар сарын 9-ний өдөр байгуулсан Харилцан итгэлцэл, хамтын ажиллагааны гэрээний хэрэгжилтийг УИХ дахь Ардчилсан намын бүлэг болон Ардчилсан намын Гүйцэтгэх зөвлөл “хангалтгүй” гэж дүгнэн, нэн даруй цуцлахаар шийдсэн. Үүнтэй холбогдуулан Монгол Улсын Засгийн газрын тухай хуулийн 23 дугаар зүйлийн 1 дэх хэсгийн 1 дэх заалтыг үндэслэн МАН-аас томилсон 6 сайдыг үүрэгт ажлаас нь огцруулах саналтай байна” гэсэн юм.

Ийнхүү санал хураалт явуулахад хуралдаанд оролцсон гишүүдийн олонх дэмжсэнээр МАН-аас Шийдлийн Засгийн газарт томилогдон ажиллаж байсан сайдуудыг огцруулснаар чуулганы хуралдаан өндөрлөв.