Монгол Улсын Ерөнхий сайд Ж.Эрдэнэбат ирэх сарын 2-ны өдөр чуулганы нэгдсэн хуралдаанд нийгмийн халамжийн чиглэлээр Засгийн газраас авч хэрэгжүүлж байгаа арга хэмжээний талаар мэдээлэл хийхээр болжээ. Өнөөдрийн байдлаар жилд 730 мянга орчим хүн нийгмийн халамжид хамрагдаж байгаа нь дөрвөн хүн тутмын нэг нь төрөөс халамж хүртдэг гэсэн үг юм байна. 2015 онд хийсэн судалгааны дүнгээс үзэхэд халамжийн үйлчилгээний 28 хувийг хүн амын амьжиргааны түвшин өндөртэй 40 хувь нь хүртжээ. Тиймээс Засгийн газар цаашид халамжийн үйлчилгээг зорилтот бүлэгт чиглүүлэх бодлого барьж байна.


•    Халамжийн төсөвт дахин хуваарилалт хийнэ
•    Халамж хүртэгчээс хөдөлмөр эрхлэгч болгох бодлого хэрэгжүүлнэ
•    Өрхийн амьжиргааг: Цалин, тэтгэвэр, үл хөдлөх хөрөнгө, авто тээврийн хэрэгслийн бүртгэл зэргийг ашиглан шинэчлэн тогтооно.
•    Жилд 13 мянган өрхийг сонгон амьжиргааг нь дээшлүүлж, нийгмийн үйлчилгээнд бүрэн хамруулан, хөдөлмөр эрхлүүлнэ
Алдар цолтой нэг ахмад настанд сард 150-200 мянган төгрөгийн нэмэгдэл тэтгэмж олгож байхад 5 ам бүлтэй нэн ядуу өрх сард 45 мянган төгрөгийн хүнсний эрхийн бичгийн дэмжлэг үзүүлж байна. 45 мянган төгрөг нь ядуу өрхийн сарын амьжиргааны хэрэглээний дунджаар 9.8 хувьтай тэнцэж байгаа нь Төв Азийн зарим улс орнуудтай харьцуулахад 5-6 дахин бага байна.