МАН-ын Бага хурал өчигдөр хуралдаж, бүтцийн асуудал хэлэлцсэн юм. Ерөнхий нарийн бичгийн даргад МАН-ын гишүүн Н.Төмөрхүү, Д.Амарбаясгалан нарыг нэр дэвшин өрсөлдөнө гэдэг мэдээлэл гарсан. Гэхдээ Бага хурлаар өнгөрсөн зургадугаар сараас хойш МАН-ын Ерөнхий нарийн бичгийн даргын үүрэг гүйцэтгэгчээр ажилласан Д.Амарбаясгаланг жинхэлэхээр болжээ. Харин нарийн бичгийн даргад Н.Төмөрхүүг МАН-ын дарга нэр дэвшүүлсэн байна. Заалнаас УИХ-ын гишүүн Д.Гантулга, Бага хурлын гишүүн Ц.Бат-Энх нарыг нэр дэвшүүлж. Санал хураалтаар Ц.Бат-Энх олонхийн санал авч нарийн бичгийн дарга боллоо.
Д.Амарбаясгалан нь 1981 онд Говь-Алтай аймагт төрсөн, 2009-2012 онд МАН-ын хэвлэл мэдээлэл олон нийттэй харилцах хэлтсийн дарга, 2008 оноос хойш Нийслэлийн Иргэдийн төлөөлөгчдийн хурлын төлөөлөгчөөр, 2012 оноо хойш НИТХ дахь МАН-ын бүлгийн даргаар ажиллаж байгаа юм.  
Ц.Бат-Энх нь 2007 онд Зам тээвэр, аялал жуулчлалын яамны Төрийн нарийн бичгийн даргаар ажиллаж байсан юм. Тэрээр УИХ-ын гишүүн асан Ц.Батаагийн дүү нь. 2012 он хүртэл тэрээр “Эрдэнэт” үйлдвэрийн Ерөнхий захирлын Хөгжлийн асуудал эрхэлсэн орлогч захирлаар ажиллаж байжээ.