Улаанбаатар хотод 534 мянган автомашин бүртгэлтэй байдаг. Үүнээс 350 орчим мянган автомашин хөдөлгөөнд оролцдог. Хичээлийн шинэ жил эхэлсэнтэй холбогдуулан орон нутгаас 90 гаруй мянган автомашин Улаанбаатар хотод нэвтэрчээ. Ингэснээр одоогоор нийслэлд 450 орчим мянган тээврийн хэрэгсэл хөдөлгөөнд оролцож байна.
Ийн автомашины тоо өсч, замын ачаалал нэмэгдсэнтэй холбогдуулан хэд хэдэн зохицуулалт хийхээр болсныг Замын хөдөлгөөн зохицуулах хэлтсийн дарга, хурандаа Б.Батболд мэдээллээ. Улаанбаатар хотын замын хөдөлгөөний ачааллын гол зангилаа болсон Төв шуудангийн уулзварын түгжрэлийг бууруулах үүднээс ойр орчмын уулзваруудад хөдөлгөөний зохион байгуулалт хийх санал гаргаж буй аж. Тухайлбал, Энхтайваны өргөн чөлөөний зүүн талаар ирдэг хөдөлгөөнийг Гадаад харилцааны яамны уулзвараар урагш эргүүлж, олимпийн гудамжаар оруулж, Гэндэнгийн гудамжаар явуулах зохион байгуулалт хийхээр төлөвлөж буй аж. Энэ нь хотын зүүн талын хөдөлгөөний ачааллыг бууруулах юм байна.
Үүнээс гадна Цэцэг төвийн уулзварыг урдаас хойш нэг чигийн хөдөлгөөнд оруулах саналыг хүргүүлж буй. Үүнтэй холбогдуулан ОХУ-ын Элчин сайдын яамны баруун талын уулзварыг сөрөг хөдөлгөөнд оруулахаар зохион байгуулалт хийж байна.
Мөн замын хөдөлгөөний дүрэм өөрчлөгдсөнтэй холбогдуулан 11 дүгээр сарын нэгнээс ачааны автомашины хөдөлгөөнийг зарим замд хязгаарлана. Тэр дундаа түгээлтийн автомашинуудын цагийн хуваарийг өөрчлөн, тэмдгийн хязгаарлалт хийнэ гэдгийг замын цагдаагийн байгууллагаас мэдээлэв. Мөн Нарантуул захаас орон нутаг руу ачаа болон хүн тээвэрлэдэг автомашиныг хязгаарлаж, хотын ойролцоох товчоод руу шилжүүлэх аж.
