Яаралтай түргэн тусламжийн төвд угаарын хийнд хөнгөн болон хүнд хэлбэрээр хордсон нийт есөн өрхийн 26 иргэн ханджээ. Тэдний 15 нь хүүхэд бол 11 нь том хүн юм байна. Нэг хүүхэд нь эмнэлэгт хэвтэн эмчлүүлж байгаа гэх мэдээллийг өнөөдөр Мэргэжлийн хяналтын газар, Онцгой байдлын газар, Эрүүл мэндийн газар, Агаарын бохирдолтой тэмцэх газраас мэдээлэл хийх үеэрээ дуулгасан.

Мөн өнөөдөр өглөөний 06:00 цагийн байдлаар эмнэлэгт таван том хүн, дөрвөн хүүхэд хэвтэн эмчлүүлж байна гэсэн юм. Тэгвэл дөнгөж сая авсан мэдээллээр өнөө өглөө Баянзүрх дүүргийн 17 дугаар хороонд нэгэн гэр бүл угаартаж охин нь нас барж, аав ээж нь сэхээнд байна гэсэн харамсалтай мэдээ ирлээ.