“Дэлхийн адууны өдөр-2026” арга хэмжээг тохиолдуулан зураач, урлаг судлалын ухааны доктор (Ph.D) Э.Гансүхийн "ХҮЛЭГ ЭРДЭНЭ" бие даасан үзэсгэлэн Соёл, спорт, аялал жуулчлал, залуучуудын яамны үзэсгэлэнгийн танхимд 2026 оны 07 сарын 01-нээс 30-ны өдрүүдэд олон нийтэд хүрч байна.Үзэсгэлэнд дэлгэгдсэн бүтээлүүд нь сүүлийн 300 орчим жилд хамаарах монгол бичгээр туурвисан 40 гаруй судар болон сүүлийн 100 гаруй жилийн наадамд түрүүлж, айрагдсан 10,000 гаруй хурдан морины гэрэл зурагт тулгуурлажээ. Зураач эдгээр түүхэн баримт, өгөгдөлд үндэслэн монгол хүлгийн шинжийн дундаж төрхийг “Өртөөлөн дүрслэх аргачлал”-аар боловсруулж, судалгааны бүтээлүүд болгосон байна.

Судалгааны үр дүнд тодорхойлогдсон монгол хүлгийн дундаж төрх нь монгол адууны архетип буюу эх хэв шинжийг тодорхойлох суурь судалгаа болж чадсан юм. Нүүдэлчдийн соёл, сэтгэлгээний салшгүй хэсэг болсон адууны соёлыг шинжлэх ухааны үндэслэлтэйгээр, урлагийн бүтээлээр дамжуулан олон нийтэд танилцуулж байгаагаараа тус үзэсгэлэн онцлогтой билээ.

Эдгээр бүтээлүүд цаашид монгол адууны өв соёл, дүрслэх урлаг, угсаатны зүй, урлаг судлал зэрэг олон чиглэлийн судалгаанд ашиглагдах үнэ цэнтэй эх сурвалж болж байна.