Сальвадорын хамгийн хүчирхэг таван дээрмийн бүлэглэлийн толгойлогчид хоёр жилийн өмнө байгуулсан гал түр зогсоох гэргээгээ дахин сэргээхэд бэлэн гэдгээ мэдэгджээ. “BBC”-гийн мэдээлснээр хоёр жилийн өмнө гал түр зогсоох гэрээ байгуулсны үр дүнд тус улс дахь хүн амины хэрэг 40 хувиар буурчээ. Дээрмийн бүлэглэлүүдийн толгойлогч нар Сальвадорын Засгийн газарт хандаж хэлэлцээр хийх зуучлагч томилох, толгойлогчдын хоригдож буй шоронгийн нөхцөлийг сайжруулахыг уриалав. Үүний хариуд дээрмийн бүлэглэлүүд нь цагдаа ба хорих газрын ажилтан, тэдний ар гэрийн эсрэг явуулж буй хүчирхийллийг багасгахаа  амлажээ. Гэмт бүлэглэлүүд өөр өөрийн нөлөөллийн бүстэй бөгөөд Сальвадорыг бараг бүхэлд нь захирдаг гэж болно. Жижиг хот, тосгод, том хотын ядуусын дүүргүүдийн  жирийн иргэн, бизнесмен дээрмийн бүлэглэлүүдэд захирагддаг. Тэдэнд татвар төлдөг бол цагдаа, төрийн албан хаагчид нь авлигад идэгдэж, бүлэглэлүүдийн талд ажилладаг болж. Улмаар дээрмийн бүлэглэлүүд өөрсдийн ашиг орлогоо нэмэгдүүлэхийн тулд шинэ тосгон, дүүргийг мэдэлдээ оруулах гэж хоорондоо тэмцэлддэг. Энэхүү тэмцэл маш хэрцгий учир дээрмийн бүлэглэлийн гишүүд төдийгүй ямар ч гэмгүй энгийн иргэн амиа алдах нь бараг энгийн үзэгдэл болж. Зуун мянган иргэн тутамын хүн амины хэргийн тоогоор Сальвадор дэлхийд тэргүүлдэг. Америкт энэ дүн зургаа байхад Сальвадорт 66 тохиодог байх аж. Зургаан сая хүнтэй Сальвадорын 50 мянга гаруй иргэн нь эдгээр дээрмийн бүлэглэлийн гишүүдтэй. Хамгийн томд тооцогддог “MS-13”, “Barrio 18” гэсэн хоёр бүлэглэл хар тамхи, контрабанд, хулгай, дээрэм, рекэт, захиалгат аллага, хууль бус цагаачлал, охид бүсгүйчүүдийн биеийг үнэлүүлэх зэрэг хэргээр дагнадаг. Үйл ажиллагаа нь зөвхөн Сальвадороор хязгаарлагддаггүй. Гондурас, Никарагуа, Уругвай, Парагвайгаас эхлээд Мексик, АНУ хүртэл олон улс дамждаг.