Токиогийн амбан захирагч Ёити Масузоэ Оросын Томск хотод айлчлал хийх үедээ хэд хэдэн сонирхолтой мэдэгдэл хийжээ.  Украины хэрэг явдалтай холбоотойгоор Японы зүгээс Оросын эсрэг хориг арга хэмжээ авсныг тайлбарлахдаа “Аюулгүй байдлын асуудлаар Япон нь АНУ-аас ямар ч байсан их хамааралтай. Хятад, Хойд Солонгос, Өмнөд Солонгостой холбоотой манай улсыг тойрсон харилцааны асуудал байгаа болохоор АНУ-ын байлдааны боломжийг түшиглэх шаардлага гарч ирж байгаа юм” гэжээ. Өөрөөр хэлбэл Япон аюулгүй байдлаа хангахын тулд АНУ-ын шахалтанд орж аргагүйн эрхэнд Оросын эсрэг хориг арга хэмжээ авсан гэдгийг хүлээн зөвшөөрчээ. Тэрээр “Оросын холбооны улсын ард  түмэн хэн Японыг ийм ээдрээтэй нөхцөл байдал руу түлхэж байгаагаа мэдээсэй гэж бид хүсч байгаа юм” гэжээ.
Японы авсан хориг арга хэмжээний талаар “Хориг арга хэмжээ авсан бусад орнуудтай харьцуулахад манай хориг арга хэмжээний түвшин ба цар хүрээ нь ялихгүйн дээр Орос ч хариу хориг арга хэмжээ авсан. Ингэснээр таагүй тойрог үүсч байгаа юм. Манай хоёр улсын харилцааг сайжруулахын төлөө бүх хүчээрээ чармайна” гэжээ. Крымийг нэгтгэсэн асуудлын талаар тайлбарлахдаа энэ хойгийн асуудлыг япончууд мэдэхгүй, яагаад Орос Крымийг их сонирхож байгааг бага ойлгодог гээд Оросыг өөрийн байр сууриа дэлхий нийтэд илүү сайн тайлбарлаж байхыг уриалсан байна.