Францын боомт хот Калед сүүлийн өдрүүдэд байдал их түгшүүртэй байна. Африк, Азиас ирсэн цагаачид Ла Маншийн хоолойг гатлан Британийн арлууд руу гарахын тулд энэ боомт хотыг дайрдаг. Сүүлийн үед цагаачдын тоо эрс нэмэгдсэн нь хотын гэмт хэргийн гаралт, ариун цэврийн нөхцөлд тун таагүй нөлөөлж эхэлснээр байдал ийм түгшүүртэй болсон юм. Ням гарагт гэхэд л цагаачид хэт их ирж байгааг эсэргүүцсэн барууны талынхан ба тэднийг эсэргүүцэгч хэт зүүний үзэлт жагсаагчдын дунд мөргөлдөөн гаргахгүйн тулд цагдаа нар дундуур нь орж тусгаарласан байна.
Сүүлийн үед цагаачдын тоо даруй 50 хувиар нэмэгдэн 1300-д хүрсэн төдийгүй Францын Кале ба Английн Дуврын хооронд явдаг гатлага онгоц руу хүчээр дайрч орох гэж хэд хэдэн удаа оролдсон аж. Одоогоор Африк, Афганистанаас ирсэн дүрвэгсэд хотын гудамж, ойролцоох модонд хууль бус хотхон байгуулан олноор амьдарч байна. Хотын оршин суугчдын бухимдал өссөөр байгаа тул хотын удирдлага төсвөөсөө хөрөнгө гарган орон сууцнаас алс зайдуу газар цагаачдыг хүлээн авах төв барихаар төлөвлөж байгаа гэнэ. Үүнээс гадна Кале хотын мэр Наташа Бушар нь нөхцөл байдлыг нэн даруй шийдэхэд Британийн эрх баригчид тусламж үзүүлэхгүй бол боомтыг хаана гэж мэдэгдээд байсан юм.
Үүний хариу болгож Британийн Цагаачлал ба аюулгүй байдлын асуудал хариуцсан сайд Жеймс Брокеншир нь Францын талд, өөрөөр хэлбэл Кале хотын удирдлагад 20 км ган хашаа үнэ төлбөргүй шилжүүлэн өгөхөд бэлэн гэж мэдэгдлээ. Энэ олон км ган хашааг хэдхэн өдрийн өмнө Британийн Уэлсд болсон НАТО-ийн чуулга уулзалтын аюулгүй байдлыг хангахад ашигласан аж.