Австралийн Ерөнхий сайд тус улсын уугуул иргэд оршин суудаг тосгонд долоо хоногийн турш ажиллаж, амьдрахаар болсон байна. Ингэснээр Австралийн Ерөнхий сайд Тони Эббот сонгуулийн кампанит ажлын үеэр өгсөн амлалтаа биелүүлж байгаа юм байна. Тэрээр сонгуулийн үеэр нам нь ялж, Ерөнхий сайд болвол жил болгон долоо хоног Австралийн уугуул иргэдийн дунд амьдарч, тэдний аж амьдралтай танилцан тулгамдаад байгаа асуудлуудыг нь шийдэж байна гэж амласан аж. Бөглүү нутагт уугуул иргэдийн дунд амьдарлаа гээд дотоод, гадаадын улс төрийн асуудлаас хөндийрөхгүй, онцгой байдал үүсвэл нийслэл Канберрад яаралтай хүрэлцэн ирж чадна гэдгийг Ерөнхий сайд онцолсон байна. Австрали тивийг Британиас гаралтай цагаачид, гэмт хэрэгтнүүд колончлон эзэлсэн түүхтэй. Тив улсыг өөрийн болгох явцдаа цагаан арьстанууд нутгийн уугуул иргэдийг янз бүрээр хавчин гадуурхаж ирсэн байдаг. Тухайлбал, өнгөрсөн зууны дундуур нутгийн уугуул иргэдийг араатан амьтдаас ялгарах зүйлгүй бүдүүлэг гэсэн шалтгаанаар хүүхдүүдийг нь булаан авч асрах газар өгч, хүчээр англи хэл, европ соёлд сургадаг байсан юм.