Украины Харьков хотод орших Лениний хөшөөг тус улсын үндсэрхэг үзэлтнүүд буулгаж хаяжээ. Хэдийгээр Харьков Украины бусад хот шиг үймээн самуунд өртөөгүй ч тус хотын оршин суугчид үндсэрхэг үзлээ ийн тунхаглалаа. Тэд эхлээд хөшөөний орчимд "Харьков бол Украин" гэсэн уриатай жагсаал хийж, ням гарагийн орой нь хөшөөг байрнаас нь татан унагажээ. Жагсагчид жагсаал цуглаан хийх зөвшөөрөл аваагүй ч Украины Дотоод хэргийн сайд Арсен Аваков шууд бус замаар хөшөөг унагахыг зөвшөөрсөн байна. Тэрээр өөрийн "Facebook" хуудсандаа "Ленин? Түүнийг унага л даа" хэмээн бичсэн байжээ.
Гэхдээ хөшөөг унагасан жагсагчдыг соёлын өв дурсгалыг сүйтгэсэн вандализмын хэргээр цагдаагийнхан шалгаж эхэлсэн мэдээ байна.