ISIS буюу Исламын улс бүлэглэлийнхэн дахин нэг хүний аминд хүрснээ дүрс бичлэгээр цацлаа. Тэд өөрсдийн барьцаалж байсан Британийн иргэн Алан Хеннингийн хоолойг хэрчиж амь насыг нь хөнөөж буй бичлэгтээ АНУ-ын Ерөнхийлөгч Б.Обама болон Британийн Ерөнхий сайд Дэвид Кэмеронд хандсан үгээ ч давхар дайжээ.
Сирид хүмүүнлэгийн тусламж хүргэхээр яваад өнгөрсөн жил террористуудад баригдсан Алан Хенингийг Исламын улсын дараагийн золиос болно гэдгийг бараг сарын өмнөөс ISIS мэдэгдсэн. Гэвч Британи улс, барууны орнууд энэ бүлэглэлийн эсрэг агаараас довтлохоос өөрөөр тэмцэж чадахгүй байгаа учир Алан шиг эгэл жирийн иргэд хохирсоор байх бололтой. Тэд Алан Хеннингийн хоолойг хэрчиж үзүүлсний дараа дараагийн золиос нь АНУ-ын армид алба хааж байсан Петер Кассиг болно гэдгийг харуулсан аж.

Ингэхдээ өөрийгөө Жихад Жон хэмээн нэрлэсэн террорисит "Обама чи Сири рүү довтолж, манай хүмүүст халдсаар байгаа учир би танай хүмүүсийг хүзүүг огтолсоор байх нь" хэмээн хэлжээ. Тэрээр мөн Алан Хенингийг хөнөөхдөө түүний үхэлд Сири рүү агаараас довтлохыг зөвшөөрсөн Британийн парламент буруутай гэж мэдэгдсэн байна.
Энэ мэдээ Алан Хенингийн гэр бүл, түүний эхнэр, хоёр хүүхдэд нь маш хүндээр тусч байгаа тухай нэвтрүүлгүүд гарсаар байна. Хохирогчийн эхнэр нөхрөө амьд үлдээхийг гуйж террористуудад хандсан боловч тус болсонгүй.

Алан Хеннингийн эхнэр хэд хоногийн өмнө террористуудад хандан нөхрийг нь суллахыг гуйсан юм.