Хойд Солонгост хоригдож байсан Америкийн хоёр иргэн эх орондоо эргэн иржээ. АНУ-ын Үндэсний тагнуулын газрын захирал Жеймс Клаппер Хойд Солонгост очиж хоёр иргэнээ авчирснаар одоо умардад эрх чөлөөгөө хасуулсан америк иргэн үлдээгүй гэнэ. Өчигдөр эх орондоо ирсэн Мэттью Тод Миллер, Кеннет Бэй хоёроос өмнө, Жеффри Фоул хэмээх Америкийн өөр нэг иргэнийг өнгөрсөн сард сулласан билээ. Хоёр иргэн нь эсэн мэнд эх нутагтаа ирсэнд талархаж байгаагаа Ерөнхийлөгч Б.Обама тэмдэглээд энэ амаргүй үүргийг гүйцэтгээд ирсэн Ж.Клапперыг үнэлжээ. НҮБ-ын Ерөнхий нарийн бичгийн дарга Бан Ги Мун Хойд Солонгосын шийдвэрийг талархан хүлээж авснаа мэдэгдсэн бол АНУ-ын албаны хүмүүс энэ явдал Хойд Солонгосын цөмийн хөтөлбөрийн талаарх байр суурийг өөрчлөхгүй гэж мэдэгджээ.

Кеннет Бэй хоёр жил умардад хоригдсон бол Мэттью Миллер долоон сарын өмнөөс саатуулагдсан. 42 настай Кеннет Бэй 2012 оны арваннэгдүгээр сард Хойд Солонгос-Хятадын эдийн засгийн тусгай бүсээр хил нэвтрэхдээ өөрийгөө аялал жуулчлалын хөтөч мөн Христийн шашныг түгээн дэлгэрүүлэгч хэмээн танилцуулсан байна. Харин Хойд Солонгос түүнийг аялал жуулчлалын бизнесээр дамжуулан бүлэглэл үүсгээд, төрийн эсрэг хуйвалдаан зохион байгуулах гэж байна хэмээн үзээд 2013 оны тавдугаар сард хөдөлмөрийн лагерьт 15 жил хорих ял оноосон юм. Харин 24 настай Миллерийн тухайд өнгөрсөн дөрөвдүгээр сарын 10-наас хойш хоригдсон бөгөөд тэрээр жуулчны визээ урж, улс төрийн орогнол олгохыг шаардсан хэмээн Хойд Солонгосын тал мэдээлдэг. Түүнд хөдөлмөрийн лагерьт зургаан жил хоригдох ял оноогоод байсан юм.
Тэднээс өмнө суллагдсан Жеффри Фоулигийн хувьд ариун цэврийн өрөөнд библь орхиж явсан хэргээр өнгөрсөн дөрөвдүгээр сард баригдаад хоёр улсын яриа хэлэлцээрийн дүнд аравдугаар сард АНУ-д эргэн ирсэн юм.