Ийм хуулийг Энэтхэгийн Гужарат мужийн парламент баталсан байна. Энэ хуулийг хүчин төгөлдөр болсноос хойш хагас жилийн дараа тус мужийн орон нутгийн сайд нар гэртээ бие засах газар байгуулсан гэдгээ орон нутгийн Засгийн газартаа мэдэгдэж, харуулах ёстой болжээ. Хэрэв гэртээ бие засах газартай болсон гэж худал мэдэгдээд шалгалтаар жорлон байхгүй нь тогтоогдвол ажлаас нь халах заалттай.

Мөн цаашид тус мужийн сонгуульд өрсөлдөх нэр дэвшигчид гэрт нь жорлон байгаа гэсэн баталгаажуулсан баримт үзүүлж байхаар болжээ.

Ариун цэврийн наад захын шаардлагыг мөрдсөн хууль батлахыг идэвхтэй дэмжигч нь Энэтхэгийн Ерөнхий сайд Нарендра Моди юм. Тэрээр 2001-2014 онуудад энд дурдагдсан өвөрмөц хуулийг баталсан Гужарат мужийн дээд сайдаар ажиллаж байсан юм.

Энэтхэг уг нь цөмийн зэвсэгтэй, сансарт пуужин хөөргөдөг гээд нэлээд өндөр хөгжилтэй улс баймаар. Гэтэл нэг мужид нь ийм хууль баталж байгаа нь хачин санагдаж магадгүй. Гэтэл статистик мэдээнээс үзвэл Энэтхэгийн тэрбум гаруй хүн амын тэн хагасаас илүү нь гэртээ жорлон, бие засах газар огт ашигладаггүй шаардлага гарвал гудамжинд бие засч амьдардаг аж. Ариун цэврийн эсрэг ийм байдал нь ундны усыг бохирдуулах улмаар олныг хамарсан халдварт өвчин гарах нөхцөл болдог.

Дэлхийн Эрүүл Мэндийн Байгууллагаас гаргасан мэдээгээр дэлхий дээр бие засах газар, жорлонг хэзээ ч ашиглаж байгаагүй 1,1 тэрбум гаруй хүн байдаг.