АНУ-ын Бүгд найрамдах намын хэвлэл мэдээлэл, харилцааны газрын дарга Элизабет Лотен хэмээх эмэгтэй Ерөнхийлөгч Б.Обамагийн охидод “Facebook” хуудсаараа сургамж айлдах гэсэн биш эцэст нь өөрөө тун ч эвгүй байдалд орж, шүүмжлэлийн бай боллоо.

АНУ-ын Ерөнхийлөгч Таларх­лын баяр тохиол­дуулан телевизээр үг хэлэхдээ цацагт хяруулын амь өршөөдөг тогтсон уламжлал. Ерөнхийлөгч цацаг хяруулын амийг өршөөх үед гэр бүлийнхэн нь, ялангуяа хүүхдүүд нь хамт байдаг заншилтай. Энэ уламжлал ёсоор Б.Обамаг үг хэлэх үеэр Малиа, Саша хоёр охин нь хамт байлцсан боловч өсвөр насны охидын хувьд энэ заншил тийм ч сонирхол татахгүй байгаа нь байр байдлаас нь илт харагдаж байсан юм. Харин Бүгд найрамдах намын хэвлэл мэдээлэл хариуцсан захирал Элизабет Лотен Ерөнхийлөгчийн охидыг аавыгаа үг хэлж байхад илт сонирхолгүй, уйтгартай царай гаргах хэрэггүй хэмээн зааварлажээ.

Тэрээр мөн Малиа, Саша хоёр хувцаслалтдаа анхаарсангүй хэмээн шүүмжлээд тэдний өмссөн богино банзал бол бааранд л өмсөх хувцас, хэдий өсвөр насны охид ч гэлээ Цагаан ордонд амьдардаг, Ерөнхийлөгчийн хүүхдүүд гэдгээ санаад бусдын хүндэтгэл хүлээхүйц, зохих ёсоор биеэ авч явах хэрэгтэй гэх мэтээр сургамжилж. Тэрээр Б.Обамагийн охидыг шүүмжлэхдээ Ерөнхийлөгч, тэргүүн хатагтай хоёрыг ч өөлөхөө мартсангүй. Тэднийг үлгэр дуурайл болж чадахгүй хүмүүс хэмээн дүгнэсэн байна.

Хэдийгээр Элизабет Лотен өөрийн үзэл бодлоо олон нийтийн сүлжээн дэх хувийн орон зайд илэрхийлсэн авч түүний энэ үйлдэл нэгдүгээрт өсвөр насны хүүхдүүдийг гутаан доромжилсон гэдгээрээ олон нийтийг ихээхэн дургүй­цүүлээд зогсохгүй Б.Оба­магийн сөрөг хүчин болох Бүгд найрамдах намын нөлөө бүхий албан тушаалтан ийм өчүүхэн дорой асуудлаар Ерөнхийлөгчийн нэр хүндийг унагах гэж оролдсон арчаагүй үйлдэл болж харагдлаа. Энэ алдаагаа ч Элизабет Лотен удалгүй ойлгосон бололтой. Facebook хуудсаараа дамжуулан Ерөнхийлөгчийн охидоос уучлал гуйгаад, энэ бодлогогүй алхмынхаа төлөө гэмшиж, зөндөө залбирсан хэмээн бичжээ.