НҮБ-ын мэдээгээр 2014 он дэлхий дахины хүүхдүүдийн хувьд хамгийн халгаатай жил байжээ. ЮНИСЕФ-ийн илтгэлд дурдсанаар Төв Африкийн Бүгд найрамдах улс, Ирак, Өмнөд Судан, Палестин, Сири, Украин зэрэг мөргөлдөөний бүс нутгуудад 15 сая хүүхэд хүчирхийллийг нүдээр харж, биеэр мэдэрч амьдарч байна. Энэ бүс нутагт амьдарч байгаа нийт хүүхэд залуусыг тооцох юм бол 230 саяд хүрэх юм. Тэдний дотор дайн дажны хөлөөс зугтааж, орон гэрээсээ дүрвэсэн, дүрвэгсдийн лагерьт тав тухгүй, хоол ундгүй шахам амьдарч байгаа хэдэн зуун мянган хүүхэд байгаа юм. Баруун Африкт гэхэд эбола вирусийн тархалтаас хамааран таван сая гаруй хүүхэд сургуульдаа явж чадахгүй завсардаад байгаа аж.